Eron oliy rahnamosi Oyatulloh Ali Xomanaiy armiyani yuqori jangovar shay holatga keltirishga ko‘rsatma berdi. Bu haqda diplomatik idoradagi manbaga tayanib, Reuters xabar berdi.
Qaror AQSHning ehtimoliy harbiy operatsiyasi haqidagi xabarlar fonida qabul qilingani aytilmoqda. Eron Iroq, Kuvayt, Birlashgan Arab Amirliklari, Qatar, Turkiya va Bahraynga agar ular AQSHga o‘z hududidan hujum qilishiga yo‘l qo‘ysa, buni dushmanlik harakati sifatida baholashi va harbiy yo‘l bilan javob berishi mumkinligi haqida ogohlantirgan.
Eronning yuqori martabali mulozimiga ko‘ra, bunday harakat “ular uchun jiddiy oqibatlarga olib keladi”. AQSH prezidenti Donald Tramp mart oyi boshida Eron oliy rahnamosiga maktub yo‘llab, unga yangi yadroviy kelishuv tuzish uchun ikki oy muhlat bergan edi.
Maktubda yangi yadroviy bitim bo‘yicha muzokaralar o‘tkazish qat’iy talab qilingan. AQSH maktub mazmuni haqida bir necha ittifoqchisini, jumladan Isroil, Saudiya Arabistoni va Birlashgan Arab Amirliklarini ham xabardor qilgan.
Eron oliy rahnamosi 12-mart kuni maktubni olgach, Trampning muzokaralar haqidagi taklifini “aldov” deb atagan. 30-mart kuni esa Eron prezidenti Mas’ud Pezeshkiyon maktubga javoban AQSH bilan ikki tomonlama muzokaralar o‘tkazishdan bosh tortgan. Tehron Vashington bilan yadro dasturi bo‘yicha muloqot faqat uchinchi davlatlar vositachiligida amalga oshirilishi mumkinligini ta’kidlagan.
Ikki tomon o‘rtasida to‘g‘ridan to‘g‘ri muzokaralar o‘tkazish imkoniyati rad etilgan bo‘lsa-da, bilvosita muzokaralar uchun yo‘l ochiqligi ta’kidlandi, degan Eron prezidenti
Bunga javoban Tramp agar kelishuv bo‘lmasa, Eronni bombardimon qilish bilan tahdid qilgan.
Agar ular kelishuvga erishmasa, unda bombardimon bo‘ladi. Bu ular hech qachon ko‘rmagan bombardimon bo‘ladi, degan AQSH rahbari.
Mazkur tahdidlar fonida Eron raketalarini jangovar shay holatga keltirgan. Uchirishga tayyor bo‘lgan raketalarning katta qismi butun mamlakat bo‘ylab havo hujumlariga bardosh bera oladigan tarzda loyihalashtirilgan yerosti inshootlariga joylashtirilgan, deyiladi xabarda.
Eron oliy rahnamosi Ali Xomanaiy esa AQSHning tashqaridan zarba berishi ehtimoli kamligini aytmoqda.
Yovuzlik tashqaridan amalga oshirilishi dargumon, ammo agar u amalga oshirilsa, ular, albatta, qattiq javob zarbasini oladi, degan u.
Izoh (0)