Eron G‘arb bilan muzokaralarda o‘ziga teng sharoitlarni ta’minlash uchun yadro qurolini yaratishi kerak. Bu haqda Oliy Majlis deputati Muhammad Qosim Usmoniy ma’lum qildi.
Uning so‘zlariga ko‘ra, Eron harbiy mojarodan qochib, oqilona va mantiqiy harakat qilmoqda, biroq “dunyo takabburligi” unga boshqa yo‘l qoldirmadi.
Yagona yo‘l — to‘xtatib turish vositasi sifatida yadro qurolini yaratish sari shiddatli va to‘xtovsiz harakat qilish, dedi u yig‘ilishda so‘zga chiqib.
Deputat Eron yadro qurolini yaratishdan barcha sohalarda, jumladan, milliy xavfsizlik sohasida ham foyda olishi mumkinligini ta’kidladi. Usmoniyning fikricha, yadroviy fan Tehronni G‘arb bilan “teng shartlar asosida” muzokaralar olib borishga olib keladi.
AQSH prezidenti Donald Tramp mart oyi boshida Eron oliy rahnamosiga maktub yo‘llab, unga yangi yadroviy kelishuv tuzish uchun ikki oy muhlat bergan edi. Maktubda yangi yadroviy bitim bo‘yicha muzokaralar o‘tkazish qat’iy talab qilingan. AQSH maktub mazmuni haqida bir necha ittifoqchisini, jumladan Isroil, Saudiya Arabistoni va Birlashgan Arab Amirliklarini ham xabardor qilgan.
Eron oliy rahnamosi maktubni olgach, Trampning muzokaralar haqidagi taklifini “aldov” deb atagan. Eron prezidenti Mas’ud Pezeshkiyon maktubga javoban AQSH bilan ikki tomonlama muzokaralar o‘tkazishdan bosh tortgan. Tehron Vashington bilan yadro dasturi bo‘yicha muloqot faqat uchinchi davlatlar vositachiligida amalga oshirilishi mumkinligini ta’kidlagan.
Bunga javoban Tramp agar kelishuv bo‘lmasa, Eronni bombardimon qilish bilan tahdid qilgan. Mazkur tahdidlar fonida Eron raketalarini jangovar shay holatga keltirgan. Uchirishga tayyor bo‘lgan raketalarning katta qismi butun mamlakat bo‘ylab havo hujumlariga bardosh bera oladigan tarzda loyihalashtirilgan yerosti inshootlariga joylashtirilgan.
Bundan tashqari Oyatulloh Ali Xomanaiy armiyani yuqori jangovar shay holatga keltirishga ko‘rsatma bergan. Qaror AQSHning ehtimoliy harbiy operatsiyasi haqidagi xabarlar fonida qabul qilingani aytilmoqda. Eron Iroq, Kuvayt, Birlashgan Arab Amirliklari, Qatar, Turkiya va Bahraynga agar ular AQSHga o‘z hududidan hujum qilishiga yo‘l qo‘ysa, buni dushmanlik harakati sifatida baholashi va harbiy yo‘l bilan javob berishi mumkinligi haqida ogohlantirgan.
Izoh (0)