Tehronning yadro qurolini yaratish tarafdorlariga Eron siyosatida o‘rin yo‘q. Bu haqda mamlakat prezidenti Mas’ud Pezeshkiyon bayonot berdi.
“Eron oliy rahbari bir necha bor ta’kidlaganidek, mamlakatimiz siyosati shundan iboratki, Eron yadro quroliga ega bo‘lmaydi va hatto uni yaratishga intilmaydi. Bu siyosatga mos kelmaydigan pozitsiyani egallagan har qanday shaxsga Eron Islom Respublikasi siyosatida o‘rin yo‘q”, deya Pezeshkiyonning so‘zlarini uning matbuot xizmati keltirdi.
Ma’lum qilinishicha, ayrim deputatlar Tehronning Yadro qurolini tarqatmaslik shartnomasidan chiqishi tarafdori edilar. Bir qator axborot portallarida parlament allaqachon shartnomadan chiqish to‘g‘risidagi qonun loyihasini ko‘rib chiqayotgani haqida ma’lumot paydo bo‘ldi, biroq keyinchalik Eron parlamenti bu ma’lumotni rad etdi.
O‘z navbatida, Eron Tashqi ishlar vazirligi shartnoma bo‘yicha qarorni yuqori hokimiyat organlari qabul qilishini ma’lum qildi. Shunga qaramay, Tehron tarqatmaslik majburiyatlariga sodiq qolishini va Yaqin Sharqda yadro quroli bo‘lmasligi kerakligini ta’kidlagan.
Pezeshkiyonning ta’kidlashicha, Eron atom energiyasidan foydalanish va yadroviy tadqiqotlar o‘tkazish huquqiga ega.
“Biz atom energiyasidan foydalanish va jamiyat foydasiga yadro sohasida tadqiqotlar o‘tkazish huquqiga egamiz. Hech kim bizdan bu huquqni tortib olishga haqli emas”, deydi Pezeshkiyon.
Shuningdek, u Eron “urushga intilmaganini” ta’kidlab, xalqni “tajovuz qarshisida” birlashishga chaqirgan.
Prezidentning so‘zlariga ko‘ra, AQSH Isroilning Eronga hujum qilishiga yo‘l qo‘yib, xalqaro huquqni buzgan.
Izoh (0)