AQSH bilan yadroviy kelishuv bo‘yicha muzokaralarda qatnashgan Eron vakillari Isroilning harbiy operatsiyasi oqibatida halok bo‘ldi. Bu haqda CNN muxbiri Dana Bash Oq uy rahbari Donald Trampga asoslanib xabar berdi.
Jurnalist AQSH prezidenti Donald Tramp bilan telefonda suhbatlashganini va undan Isroilning Eronga bergan zarbalari haqidagi fikrini so‘raganini aytdi.
Bashning so‘zlariga ko‘ra, Tramp unga “u aloqada bo‘lgan odamlar endi hayotda yo‘q” deya ma’lum qilgan. Respublikachi ularni “qattiq pozitsiya tarafdorlari” deb atagan.
Jurnalist AQSH prezidentidan muzokarachilar Isroil harakatlari oqibatida halok bo‘lganmi deb aniqlashtirganida, “U juda kinoyali ohangda: ular grippdan ham, koronavirusdan ham o‘lmagan”, deb javob bergan.
Tramp Isroilning harakatlarini “juda samarali” deb baholagan. Jurnalistning ta’kidlashicha, u Isroil hukumati tomonidan ko‘rilgan choralarni ham qo‘llab-quvvatlagan.
13-iyunga o‘tar kechasi Isroil Eron yadro quroli yaratishga yaqinlashgani sababli yadroviy, harbiy obyektlar va yuqori martabali harbiylar joylashgan manzillarga hujum qildi.
Zarbalar oqibatida Islom inqilobi qo‘riqchilari korpusining bir necha rahbarlari va eronlik fizik-yadroshunoslar halok bo‘ldi. Ular orasida Korpus qo‘mondoni Husayn Salamiy, Eron Qurolli kuchlari bosh shtabi boshlig‘i Muhammad Baqeriy, IIQK “Xotam al-Anbiyo” bo‘linmasi qo‘mondoni G‘ulom Ali Rashid, shuningdek, olimlar Faridun Abbosiy Davoniy va Ozod Muhammad Mahdiy Tehronchiy bor. Jami 78 kishi halok bo‘ldi, 320 dan ortiq kishi jarohat oldi.
O‘sha kuni kechqurun Islom inqilobi qo‘riqchilari korpusi Isroilga qarshi “Haqiqiy va’da-3” javob operatsiyasi boshlanganini e’lon qildi. Eron Isroilga uch marta raketa zarbalari berdi, zarbalar bir nechta shaharlarda qayd etildi. 70 dan ortiq kishi jarohat oldi, bir ayol halok bo‘ldi. Shu paytda Tehronda yana portlashlar eshitildi.
Eron va AQSH aprel oyida yadroviy kelishuv bo‘yicha muzokaralarni qayta boshladi, besh raund o‘tkazildi. Ular asosan Ummon hududida va bilvosita tarzda bo‘lib o‘tdi. Eron yadro quroli yaratishga intilish haqidagi ayblovlarni rad etmoqda va kelishuv doirasida uranni boyitishdan voz kechmoqchi emas.
Izoh (0)