Turkiya prezidenti Rajab Toyyib Erdo‘g‘on Isroilning Eronga hujum qilish imkoniyati G‘arbning uni haddan tashqari qo‘llab-quvvatlashi va Isroil nima qilayotganini tushunmasligi oqibatida yuzaga kelganini bildirdi.
“G‘arbning cheksiz ko‘magiga tayanib, Eronga hujum qilayotgan, G‘azoni vayron etayotgan va mintaqadagi barcha davlatlarni mensimaydigan Isroil o‘z qilmishlarining oqibatini anglamayapti. Ehtimol, kelajakda u o‘z xatosini tushunib yetadi, ammo biz juda kech bo‘lishidan xavotirdamiz.
Hech bir mamlakat o‘z chegaralari doirasida qolib ketmaydi. Mintaqadagi har bir voqea barcha jamiyatlarga ta’sir ko‘rsatib, o‘rta va uzoq muddatli oqibatlarga olib keladi. Falastin xalqi va uning yeriga qilingan tajovuz bir necha million kishi bilan cheklanib qolmaydi. Eronga qilingan hujum ham faqat Eronga taalluqli emas”, dedi Turkiya rahbari Vazirlar Mahkamasi yig‘ilishidan so‘ng millatga qilgan murojaatida.
Isroil 13-iyunga o‘tar kechasi Eronga qarshi harbiy operatsiya boshladi va uni qaytarib bo‘lmas nuqtaga yaqinlashgan maxfiy harbiy-yadroviy dasturni amalga oshirishda aybladi. Havo hujumlari va qo‘poruvchi guruhlar reydlarining nishonlari atom obyektlari, generallar, taniqli yadro fiziklari, aviabazalar, havo mudofaasi vositalari va “yer-yer” turdagi raketalar bo‘ldi.
O‘z atom loyihasining harbiy maqsadlarga yo‘naltirilganini inkor etayotgan Eron raketa zarbalari va hujumkor dronlarni uchirib javob qaytarmoqda. Tehronda zarbalar nishoni sifatida Isroilning harbiy va harbiy-sanoat obyektlari ko‘rsatilmoqda. Har ikki tomondan ham turar joy binolariga yetkazilayotgan zarar va tinch aholi orasidagi qurbonlar soni ortib bormoqda.
Isroil ma’lumotlariga ko‘ra, Eron zarbalaridan 20 dan ortiq kishi halok bo‘lgan, 600 dan ziyod kishi jarohat olgan. Eron esa 220 dan ortiq halok bo‘lgan va 1200 dan ziyod jabrlanganlar haqida xabar bermoqda.
Isroil va Eron kuniga bir necha bor o‘zaro zarba almashmoqda. Isroil Eronning yadro dasturi yo‘q qilinmaguncha kampaniyani davom ettirishga va’da bermoqda, Eron esa o‘z navbatida Isroil bombardimonni to‘xtatmaguncha hujumlarni davom ettirish bilan tahdid qilmoqda.
Izoh (0)