21-may kuni Hindiston poytaxtiga yog‘gan kuchli jala va yirik do‘l oqibatida besh kishi halok bo‘ldi. Bu haqda politsiya ma’lumotlariga asoslanib The Times of India agentligi xabar berdi.
Tabiiy ofat natijasida 22 yoshli yigit, nogironligi bor shaxs va yana uch kishi vafot etgan. To‘satdan yog‘gan jala bilan bog‘liq hodisalar tufayli kamida 11 kishi tan jarohati olgan.
Kuchli do‘l va shiddatli shamol butun shaharga zarar yetkazib, transport harakatini izdan chiqargan, ko‘plab daraxtlarni ildizi bilan qo‘porib tashlagan. Ijtimoiy tarmoqlar harakatlanayotgan transport vositalari ustiga daraxtlar qulab tushayotganini aks ettiruvchi video va suratlar bilan to‘lib-toshdi. Kuchli yomg‘ir va momaqaldiroq sababli Dehli aeroportiga kamida 13 ta reys yo‘nalishini o‘zgartirgan.
Shaharning ko‘plab hududlarida elektr ta’minoti uzilgan, chunki momaqaldiroq va do‘l elektr energiyasi infratuzilmasiga shikast yetkazgan. Qulab tushgan daraxtlar va shoxlar elektr uzatish liniyalarini shikastlagan, bu esa shaharning bir qancha qismlarida elektr ta’minotining uzilishiga olib kelgan.
Aeroportida faoliyat yurituvchi aviakompaniyalar yo‘lovchilarni reyslarning kechikishi va jadvalidagi o‘zgarishlar haqida oldindan ogohlantirgan edi. Bo‘ron paytida samolyotda bo‘lgan yo‘lovchilardan biri kuchli turbulentlik haqida so‘zlab bergan. Uning ta’kidlashicha, layner fyuzelyajning old qismi shikastlanganiga qaramay, uchuvchining mahorati tufayli qo‘nishga erishgan.
Hindiston meteorologiya departamenti ma’lumotlariga ko‘ra, bo‘ron paytida shamol tezligi soatiga 79 kilometrgacha yetgan. Yetilgan gilos mevasidek kattalikdagi do‘l mahalliy aholi uchun kutilmagan hodisa bo‘ldi. Bunday ob-havo hodisasi Hindiston poytaxtida juda kamdan-kam kuzatiladi, chunki u yerda may oyida kunduzi havo harorati odatda 40 darajadan oshadi.
Avstraliyaning janubi-sharqida yog‘gan yomg‘ir qisqa muddatli toshqinlarni keltirib chiqargan, ko‘plab shaharlarni tashqi dunyodan uzib qo’ygan va aholi uy tomlarida jon saqlayotgani xabar qilingandi.
Izoh (0)