Vyetnam hukumati Telegram messenjeriga kirishni butunlay bloklaydi. Bu haqda hukumat hujjatlari bilan tanishib chiqqan Reuters agentligi xabar berdi.
Telekommunikatsiya xizmatlari provayderlariga Telegram’ga kirishni bloklash to‘g‘risida ko‘rsatma berilgan. Tegishli ko‘rsatma mamlakat Texnologiyalar vazirligi tomonidan yuborilgan. Telegram jinoiy faoliyatga qarshi kurashda hamkorlik qilishdan bosh tortgani bunga sabab qilib ko‘rsatilmoqda. Xuddi shunday asoslar bo‘yicha Fransiyada Telegram asoschisi Pavel Durov tergov qilinmoqda.
Texnologiyalar vazirligi telekommunikatsiya kompaniyalarini “Vyetnamda Telegram faoliyatiga yo‘l qo‘ymaslik uchun yechimlar va choralar ko‘rishga” chaqirgan. 21-may sanasi ko‘rsatilgan hujjatga asosan provayderlar ko‘rilgan choralar haqida 2-iyundan kechiktirmay xabar berishi kerak.
Kiberxavfsizlik departamenti ma’lumotlariga ko‘ra, Vyetnamda faoliyat yuritayotgan messenjerdagi 9 600 ta kanal va guruhlarning 68 foizi qonunchilikni buzadi. Ular firibgarlik, giyohvand moddalar savdosi va hukumat taxmin qilganidek, terrorizm bilan bog‘liq.
Vazirlik vakili ta’kidlashicha, Telegram’ni bloklash to‘g‘risidagi qaror messenjer jinoiy ishlar bo‘yicha tergov doirasida foydalanuvchilar ma’lumotini hukumatga bermaganidan so‘ng qabul qilingan.
Shuningdek, Telegram qonunni buzadigan ma’lumotlarni kuzatish, o‘chirish va bloklash majburiyatini yuklaydigan huquqiy me’yoriy talablarni bajarmaslikda ayblanmoqda. Hujjatlarga ko‘ra, messenjerda hukumatga qarshi materiallar tarqatgan guruhlar tashkil etilgani politsiya tomonidan aniqlangan.
SOAX kompaniyaga ko‘ra, Telegram 2023-yil iyul oyida 800 million oylik faol foydalanuvchiga ega bo‘lgan, bu 2022-yil noyabr oyidagi 700 milliondan 14,29 foizga ko‘pdir. Premium obunaga ega bo‘lganlar 5 million kishini tashkil etadi. Vyetnam messenjer foydalanuvchilari soni bo‘yicha 10 talikka kiradi:
- Hindiston — 104,0 million
- Rossiya — 34,4 million
- Indoneziya — 27,2 million
- Qo‘shma Shtatlar (AQSH) — 26,9 million
- Braziliya — 21,9 million
- Misr — 14,9 million
- Vyetnam — 11,8 million
Izoh (0)