Xitoy may oyida Hindiston bilan yuz bergan to‘qnashuv vaqtida Pokistonga havo mudofaasi va sun’iy yo‘ldosh orqali yordam ko‘rsatgan. Bu haqda Hindiston Mudofaa vazirligiga qarashli tadqiqot markaziga tayanib, Bloomberg xabar berdi.
Markaz direktori Ashok Kumarga ko‘ra, Xitoy Hindiston qo‘shinlari va texnikasining harakatlanishini yaxshiroq kuzatish uchun Pokistonga radar va havo hujumidan mudofaa tizimlarini yangilashga yordam bergan. Bundan tashqari, 22-apreldagi Kashmirdagi hujum va qurolli to‘qnashuvlar boshlangan davr oralig‘ida Pokistonga Hindiston ustidagi sun’iy yo‘ldosh kuzatuv imkoniyatlarini yaxshilashda yordam berilgan.
Kumarning ta’kidlashicha, Xitoy Pokistonga Hindistonning havo harakatlariga o‘z vaqtida javob qaytarish imkonini bergan ma’lumotlarni taqdim etgan. Hindiston hukumati Xitoyning mojarodagi ishtiroki tafsilotlarini rasman oshkor qilmagan.
Pokiston avvalroq Xitoy qurollaridan foydalanayotgani haqida ma’lum qilgandi. Biroq yangi ma’lumotlar Pekinning chuqurroq ishtiroki, jumladan, logistika va razvedka yordamini ko‘rsatmoqda. Xitoy va Pokiston, shuningdek, rasmiy Dehli hozircha mazkur xabarga munosabat bildirmagan.
Hindiston va Pokiston o‘rtasidagi mojaro Xitoy qurollarining imkoniyatlarini ko‘rsatdi. Xitoy qurollari ikki davlat o‘rtasidagi voqealardan keyin yuqori samaradorligi bilan e’tirof etildi.
Ikki davlat o‘rtasidagi munosabatlar 22-aprel kuni Kashmirning Pahalgam hududida yuz bergan terrorchilik hujumi sabab keskinlashdi. Hujum oqibatida 26 kishi halok bo‘ldi. Qurolli shaxslar mahalliy aholi va sayyohlarga qarata o‘t ochdi. Hindiston Pokistonni bu hujumni qo‘llab-quvvatlashda aybladi. Pokiston mazkur da’voni rad etib, tekshiruv o‘tkazishni talab qildi.
Hindiston Pokiston bilan 1960-yildagi Hind suvlar to‘g‘risidagi shartnomani to‘xtatib, chegara bo‘ylab suv oqimini to‘xtatib qo‘ydi. Pokiston bu urush ochishga teng ekanini bildirdi. Mamlakat Hindiston bilan diplomatik va savdo aloqalarini chekladi, havo maydonini yopdi va savdo aloqalarini to‘xtatdi.
Chegara bo‘ylab kichik qurolli to‘qnashuvlar va raketa sinovlari ko‘paydi. Pokiston qisqa masofali Fatah raketasini sinovdan o‘tkazdi, Hindiston esa xavfsizlik mashg‘ulotlarini kuchaytirdi Xalqaro hamjamiyat, jumladan Qo‘shma Shtatlar, tomonlarni ziddiyatni eskalatsiya qilmaslikka chaqirib, diplomatik kanallarni tiklashga chaqirgandi.
Hindiston va Pokiston 10-may kuni soat 17:00 dan boshlab quruqlikda, havoda va dengizda barcha otishmalar va harbiy harakatlarni to‘xtatishga kelishib oldi. Bir necha soat o‘tgach, tomonlar bir-birini o‘t ochishda aybladi. AQSH vositachiligida yadro quroliga ega qo‘shnilar o‘rtasida kelishilgan o‘t ochishni to‘xtatish tartibi hozircha saqlanib qolgan.
Izoh (0)