Yulduzlik maqomi nafaqat shon-shuhrat, balki pul ham keltiradi. Muvaffaqiyatga erishgan ko‘plab mashhurlar ushbu resurslardan tadbirkorlik bilan shug‘ullanish uchun foydalanadi. Kimdir o‘zining sevimli hobbisini rivojlantirish uchun sarmoya kiritadi, yana kimdir esa kiyim-kechak liniyasini yaratadi. Quyida o‘zbek shou-biznesidagi taniqli ayollarning muvaffaqiyatli biznes loyihalari haqida so‘z yuritamiz.
1. Yulduz Usmonova tuxum fabrikasi va xususiy klinika asoschisi
O‘zbek primadonnasi Yulduz Usmonovaning Navoiy viloyatida joylashgan My Yumurta nomli tovuq fermasidagi tovuqlar xonandaning musiqalarini eshitib tuxum qo‘yishar ekan. Tuxumlar asosan Navoiy bozorida sotiladi. “Tovuq yetti xazinaning biri, oson deb o‘ylaganlar, tuxum o‘z-o‘zidan paydo bo‘lmaydi, buni chaqaloq katta qilganday yetishtiramiz”, deydi Yulduz.
Bundan tashqari, Mymed nomli zamonaviy tibbiyot markazi ham Usmonovaga tegishli bo‘lib, 2021-yildan buyon bemorlar dardiga darmon bo‘lib kelmoqda. Xonandaning aytishicha, ushbu klinika uchun juda katta pul tikilib, Hindiston va Turkiyadan uskunalar olib kelingan.
2. Munisa Rizayeva mehmonxona, turfirma, to‘y va tadbirlarni tashkillashtirish xizmati hamda halol kosmetika brendiga ega ko‘p qirrali ayol sanʼatkorlardan biri
Retro Palace mehmonxonasi xonandaning eng birinchi biznes loyihalaridan hisoblanadi. Munisa Rizayeva Jahongir Latipovga bergan intervyusida Retro Palace mehmonxonasi haqida ham to‘xtalib o‘tgan edi. Uning aytishicha, ushbu mehmonxonani 2008-yilda otasi qizi uchun qurib bergan. Mehmonxona shahar markazida, xonandaning uyi yaqinida joylashgan bo‘lib 50 ta xonadan va 2 ta katta, 500 kvadrat metrli xonalardan iborat.
Munisa Latipovning mehmonxonadan qancha foyda ko‘rishi haqidagi savoliga quyidagicha javob berdi: “Mehmonxonani men boshqargan paytlarim oyiga 250 ming dollar foyda keltirar edi, hozir esa 50-60 ming atrofida. Lekin hozirda mehmonxona butunlay dadam nomiga o‘tib ketgan. 2008-yillarda 3 yulduzli mehmonxonalar juda kam edi, Bek set, Ichan qalʼa va mening mehmonxonam bor edi, xolos, hozir esa har qadamda mehmonxonalar bor”, dedi Munisa.
Ritstour nomli turfirmani esa singlisi Karima Rizayeva bilan birgalikda yuritib kelmoqda. Munisa o‘zining muvaffaqiyatli tashkillashtirilgan to‘yidan ilhomlanib Mooniswedding nomli to‘y va tadbirlarni tashkillashtirish bilan shug‘ullanuvchi firma ochdi. Yaqinda esa Munisa o‘z ijtimoiy tarmoqlarida Koreya bilan hamkorlikda o‘zining halol kosmetika liniyasiga asos solayotgani bilan bo‘lishdi.
3. Nilufar Usmonova — do‘kondor qo‘shiqchi
Mikasa by Nu — ayollarbop do‘kon bo‘lib u yerda idish-tovoqlar va uy uchun turli xil dekorlar sotiladi.
4. Shahzoda Muhammedova — serqirra biznesvumen
Aktrisa, boshlovchi, dizayner Shahzoda moda va dizayndan taʼlim beruvchi Shakhzoda Fashion Academy asoschisi hisoblanadi. Bundan tashqari, Milana couture nomli ona va qiz uchun individual kiyim tikuvchi atelye ham unga tegishli.
5. Parizoda — raqs maktabi asoschisi
“Parizod” — O‘zbekistondagi birinchi raqs maktabi bo‘lib, ko‘plab qobiliyatli raqqosalarni yetishtirib kelmoqda.
6. Sitora Alimjonova ko‘pchilik Gollivud yulduzlari kabi o‘z kosmetika brendiga ega
SiʼDora — tabiat bilan hamnafas, Koreyada ishlab chiqariluvchi, aktrisaning opasi Dildora Hoshimova bilan birgalikda asos solingan kosmetika brendi.
7. Feruza Normatova — aktrisa, bloger va kiyim do‘koni egasi
Jana byferuza 2023-yildan buyon onlayn formatda faoliyat yurituvchi do‘kon bo‘lib, Italiya va Dubay matolaridan tikilgan kiyim hamda ro‘mollar bilan ayollar qalbidan joy oldi, 13-mayda esa do‘kon ko‘rinishida ochildi.
8. Rayhon Asadova ham o‘zi kabi nafis kiyimlar yaratadi
“Nafisim.uz” — butun dunyo bo‘ylab yetkazib berish imkoniyati mavjud bo‘lgan shaxsiy kiyim brendi.
9. Zamira Beshimova o‘z sohasida bilganlarini boshqalarga ham o‘rgatishni afzal ko‘rdi
Talents Project — bu 4 yoshdan 17 yoshgacha bo‘lgan bolalarga aktyorlik mahoratini va bundan tashqari vokal, defile, raqs va sahna kurashini o‘rgatuvchi loyiha.
10. Maftuna Shokirova bo‘lajak kelinlar uchun milliy liboslarni taqdim etuvchi do‘kon asoschisi
“Maftun” ayollar kiyim do‘koni asosan milliy yo‘nalishdagi kiyimlarni taqdim etadi, yangi kolleksiyalar reklamalarida esa aktrisa o‘zi suratga tushadi.
Izoh (0)