Pokistonda xudkush terrorchi 21-may kuni maktab avtobusini portlab yubordi. Oqibatda kamida to‘rt bola halok bo‘ldi, 30 dan ortig‘i jarohatlandi. Bu haqda ABC News xabar berdi.
Hujum Balujiston viloyatining Xuzdar tumanida yuz bergan. Hodisa avtobus bolalarni shahardagi maktabga olib ketayotgan paytda sodir bo‘lgan. Hech bir guruh hujum uchun mas’uliyatni darhol o‘z zimmasiga olmagan.
Pokiston ichki ishlar vaziri Mohsin Naqvi hujumni keskin qoralab, bolalarning o‘limidan chuqur qayg‘uda ekanini bildirgan. U jinoyatchilarni shafqatga loyiq bo‘lmagan “hayvonlar” deb atagan. U dushman “begunoh bolalarni nishonga olib vahshiylik” qilganini aytgan.
Balujiston uzoq davom etgan qo‘zg‘olon maydoni bo‘lib, u yerda bir qator separatist guruhlar, jumladan, 2019-yilda AQSH tomonidan terrorchilik tashkiloti deb topilgan “Balujiston ozodlik armiyasi” ham hujumlar uyushtirgan.
So‘nggi hujum Afg‘oniston bilan chegaradosh Balujiston viloyatidagi Qillah Abdulloh shahridagi bozor yaqinida avtomobil portlashi oqibatida 4 kishi halok bo‘lganidan bir necha kun o‘tib sodir bo‘ldi.
Bunday hujumlarning aksariyatini “Balujiston ozodlik armiyasi” o‘z zimmasiga oladi, Pokiston ular Hindiston tomonidan qo‘llab-quvvatlanganini ta’kidlaydi.
Izoh (0)