Hindistonda uch kun ichida 11 kishi Pokiston foydasiga josuslik qilishda ayblanib hibsga olindi. Qo‘lga olishlar josuslik faoliyatiga chek qo‘yish bo‘yicha umummilliy kampaniya davomida amalga oshirildi. Bu haqda India Today xabar berdi.
Hindiston rasmiylariga ko‘ra, ayblanuvchilar josuslik tarmog‘iga ijtimoiy tarmoqlar, xabar almashish ilovalari orqali, pul mukofoti evaziga va shaxsan Pokistonga tashriflari chog‘ida jalb qilingan. Qo‘lga olinganlarning barchasi 20 yoshdan 30 yoshgacha ekani aytilmoqda. Hibsga olishlar uchta shtatda — Xaryana, Panjob va Uttar-Pradeshda sodir bo‘lgan.
Qo‘lga olinganlar orasida Pokistonga ikki marta tashrif buyurgan trevel-bloger Joti Malxotra, shuningdek, “Siyosatshunoslik” fakulteti talabasi, qo‘riqchi va tadbirkor ham bor.
Ikki davlat o‘rtasidagi munosabatlar 22-aprel kuni Kashmirning Pahalgam hududida yuz bergan terrorchilik hujumi sabab keskinlashdi. Hujum oqibatida 26 kishi halok bo‘ldi. Qurolli shaxslar mahalliy aholi va sayyohlarga qarata o‘t ochdi. Hindiston Pokistonni bu hujumni qo‘llab-quvvatlashda aybladi. Pokiston mazkur da’voni rad etib, tekshiruv o‘tkazishni talab qildi.
Hindiston Pokiston bilan 1960-yildagi Hind suvlar to‘g‘risidagi shartnomani to‘xtatib, chegara bo‘ylab suv oqimini to‘xtatib qo‘ydi. Pokiston bu urush ochishga teng ekanini bildirdi. Mamlakat Hindiston bilan diplomatik va savdo aloqalarini chekladi, havo maydonini yopdi va savdo aloqalarini to‘xtatdi.
Chegara bo‘ylab kichik qurolli to‘qnashuvlar va raketa sinovlari ko‘paydi. Pokiston qisqa masofali Fatah raketasini sinovdan o‘tkazdi, Hindiston esa xavfsizlik mashg‘ulotlarini kuchaytirdi Xalqaro hamjamiyat, jumladan Qo‘shma Shtatlar, tomonlarni ziddiyatni eskalatsiya qilmaslikka chaqirib, diplomatik kanallarni tiklashga chaqirgandi.
Hindiston va Pokiston 10-may kuni soat 17:00 dan boshlab quruqlikda, havoda va dengizda barcha otishmalar va harbiy harakatlarni to‘xtatishga kelishib oldi. Bir necha soat o‘tgach, tomonlar bir-birini o‘t ochishda aybladi. AQSH vositachiligida yadro quroliga ega qo‘shnilar o‘rtasida kelishilgan o‘t ochishni to‘xtatish tartibi hozircha saqlanib qolgan.
Izoh (0)