Pokiston bosh vaziri Shahboz Sharif Hindistonga qarshi urushda g‘alaba qozonilgani, ammo ular tinchlikni xohlashini aytib o‘tdi.
Hindistonga qarshi operatsiya muvaffaqiyatli kechganini qayd etgan bosh vazir mamlakati doimo tinchlik tarafdori ekanini ta’kidladi: “Biz dushmanimizga saboq berdik, ammo tajovuzkorlikni qoralaymiz. Biz bu mintaqa ham boshqalar kabi gullab-yashnagan va ilg‘or bo‘lishini istaymiz. Bunga erishish uchun tinchliksevar qo‘shnilar kerak, shuningdek, tinimsiz sa’y-harakatlar zarur”.
Shahboz Sharif Kashmir muammosining yechimi mintaqada barqaror tinchlik uchun muhim ekanini ta’kidladi: “Biz uchta urush qildik, lekin hech narsaga erishmadik. Endi Pokiston va uning qo‘shnilari birlashib, tinchliksevar qo‘shni sifatida harakat qilib, yillar davomida mavjud bo‘lgan muammolarni hal qilishi kerak”.
Bosh vazir Hindiston “qizil chiziq”ni kesib o‘tganini va Pokistonning xalqaro tergov taklifini rad etganini ta’kidladi. Uning ta’kidlashicha, aynan shuning uchun ular 9-maydan 10-mayga o‘tar kechasi o‘z qo‘mondonlari bilan muzokaralar chog‘ida qarama-qarshi tomonga “zaruriy javob” berishga qaror qilgan.
Sharifning aytishicha, o‘sha kechasi mahalliy vaqt bilan soat 02:30 atrofida Bosh shtab rahbari Hindistonning Pokistonni ballistik raketa bilan urganini ma’lum qilgan: “U menga janob bosh vazir, dushmanga ular hech qachon unutmaydigan tarzda javob qaytaraylik, dedi”.
Bosh vazir Pokiston o‘sha kechada qasos olganini va keyin frontning narigi tomonidan sulh bo‘yicha chaqiriq bo‘lganini aytdi:
Bosh shtab boshlig‘i menga “Biz munosib javob berdik, hozir ular sulh so‘rayapti”, dedi. Men: “Dushmanni qiynab, sulhni qabul qilishdan ko‘ra yaxshiroq nima bo‘lishi mumkin?”, deb javob berdim.
Izoh (0)