Pokiston va Hindiston chegarasi yaqinidagi havo hududidan foydalanishga qo‘yilgan vaqtinchalik cheklovlar sabab Uzbekistan Airways parvoz jadvalida majburiy o‘zgarishlar bo‘ladi.
Aviakompaniya matbuot xizmatining ma’lum qilishicha, mazkur o‘zgarishlar quyidagi yo‘nalishlarga taalluqli: Toshkent—Dehli, Mumbay, Laxor, Bangkok, Kuala Lumpur, Pxuket va ushbu shaharlar bilan bog‘liq qaytish yo‘nalishlari. Ba’zi holatlarda uchish vaqti o‘rtacha 1,5 soatga yoki undan ko‘proqqa oshishi mumkin.
Agar reys bekor qilinsa, yo‘lovchilarga yaqin sanalarga qayta bron qilish (jarimasiz) yoki aviabilet summasini to‘liq qaytarish imkoniyati taqdim etiladi.
Toshkentdan Dehli, Mumbay va Laxor shaharlariga reyslar bo‘yicha qo‘shimcha ma’lumotlar parvozlar jadvali to‘liq yangilangandan so‘ng taqdim etiladi.
“Biz yo‘lovchilarimiz uchun aniq jadval va sayohatning ishonchli bo‘lishi qanchalik muhim ekanini yaxshi tushunamiz va tashqi omillarga qaramasdan barqaror parvozlarni ta’minlash uchun bor kuchimizni sarflamoqdamiz”, deyiladi aviakompaniya xabarida.
Kompaniya mavjud sharoitda reyslar o‘z vaqtida amalga oshirilishda davom etayotgani, biroq xavfsizlik nuqtayi nazaridan yo‘nalishlarda qo‘shimcha o‘zgarishlar, jadvaldagi tuzatishlar va boshqa moslashuvlar bo‘lishi ehtimoldan holi emasligini qayd etib o‘tdi.
Yuqoridagi manzillarga safar rejalashtirayotgan yo‘lovchilarga aktual jadvalni oldindan tekshirish va imkoniyat bo‘lsa, safarni, ayniqsa, transferli parvozlar yoki biznes uchrashuvlarni qo‘shimcha vaqt zaxirasi bilan rejalashtirish tavsiya qilindi.
Pokiston va Hindiston o‘rtasidagi chegara hududlarida yuzaga kelgan beqaror vaziyat tufayli 8–9-may kunlari Toshkentdan Laxorga uchadigan reyslar bekor qilingandi. Uzbekistan Airways, shuningdek, Yaqin Sharq va Osiyo-Tinch okeani mintaqasi yo‘nalishlarida parvozlar jadvaliga o‘zgartirishlar kiritilishini maʼlum qilgandi.
Izoh (0)