Bollivud bu nafaqat yuksak kino san’ati olami, balki insoniylik fazilatlari mujassam mashhurlarni jamlagan sahna. Millionlab muxlislar sevgan aktyorlar orasida shunday insonlar borki, ular kamera yorug‘ligi o‘chgandan so‘ng ham atrofga nur taratishda davom etadi. Ular o‘zlarining saxovatli yuragi bilan hayotga umid baxsh etadi. Quyidagi aktyorlar ismi reyting emas, balki ularning jamiyat rivoji uchun qo‘shgan hissasining e’tirofidir.
Priyanka Chopra
Go‘zallik tanlovi g‘olibasi, ham Gollivudda, ham Bollivudda muvaffaqiyat qozongan Priyanka Chopra inson huquqlari va qiz bolalar taqdiri uchun jonbozlik ko‘rsatib keladi. U 2006-yildan buyon UNICEF bilan hamkorlik qiladi, 2016-yilda esa ezgu niyat elchisiga aylangan.
Uning asosiy yo‘nalishi ta’lim, sog‘liqni saqlash va gender tenglik masalalaridir. Chopra mahalliy va nodavlat tashkilotlarni qo‘llab-quvvatlab, minglab qiz bolalarning maktabga qaytishiga zamin yaratdi. COVID-19 pandemiyasi davrida ham GAVI (Global Vaccine Alliance) bilan hamkorlikda kam ta’minlangan oilalarga yordam berdi.
Shohrux Xon
Hind kinosi qiroli sifatida tanilgan Shohrux Xon real hayotda ayollar huquqi va erkinligini himoya qiluvchi insondir. U asos solgan Meer Foundation fondi kislota hujumi qurboni bo‘lgan ayollarga tibbiy, ijtimoiy, huquqiy va psixologik yordam ko‘rsatadi.
Shuningdek, fond turli ta’lim loyihalari, shifoxonalar va sog‘liqni saqlash tashabbuslarini qo‘llab-quvvatlaydi. Aktyor 2018-yilda Jahon iqtisodiy forumida Crystal Award bilan taqdirlangan, mazkur xalqaro e’tirof uning insonparvarlik faoliyatining kuchli isbotidir.
Nana Patekar
Nana Patekar Maharashtra shtatida yashovchi qurg‘oqchilikdan aziyat chekayotgan dehqon va fermerlarga yordam berish maqsadida 2015-yilda Naam Foundation’ni tashkil qilgan. Unga hamkasb do‘sti Makarand Anauspure aktyorga hamrohlik qilgan.
Fond hozirgacha minglab fermer oilalariga moliyaviy yordam ko‘rsatdi. Nana Patekar shaxsan o‘zi qishloqlarga boradi, marhum fermerlarning oilalariga bevosita yordam beradi va sog‘liqni saqlash lagerlari tashkil etadi.
Amitabh Bachchan
Hind kinosining tirik afsonasi Amitabh Bachchan sahnada rollari bilan yuraklarni zabt etgan bo‘lsa, real hayotda sog‘liqni saqlash va ta’lim yo‘lida beminnat xizmat qilmoqda. U 2002-yildan buyon poliomielitga qarshi kurashda UNICEF’ning yuziga aylangan.
Bundan tashqari, u saraton kasalligiga chalingan bemorlar uchun yirik xayriyalar qilgan, qishloqlardagi bolalar ta’limini moliyalashtirgan va kasalxonalar qurilishida ham ishtirok etgan.
Salmon Xon
Salmon Xon o‘zining insonparvarlik brendi — Being Human Foundation asoschisidir. Fond 2007-yilda tashkil etilgan bo‘lib, Hindiston bo‘ylab sog‘liqni saqlash, ta’lim, oziq-ovqat, kiyim-kechak va boshqa ijtimoiy sohalarda keng qamrovli yordam ko‘rsatmoqda.
Fondga qarashli do‘konlarda sotilayotgan mahsulotlardan tushgan foyda to‘g‘ridan-to‘g‘ri xayriyaga yo‘naltiriladi. Shuningdek, tibbiy ko‘riklar, yurak operatsiyalari, ko‘z nurini tiklash va maktab ta’limi loyihalari ham fond faoliyatining bir qismidir.
Izoh (0)