Hindistonning Uttar-Pradesh shtatida momaqaldiroqli jala oqibatida kamida 45 kishi hayotdan ko‘z yumdi. Bu haqda Times of India gazetasi xabar bermoqda.
“Chorshanba kuni kechqurun va payshanba kuni tongda Uttar-Pradeshning bir nechta tumanlarida yoqqan momaqaldiroqli jala oqibatida kamida 45 kishi halok bo‘ldi. Eng ko‘p qurbonlar Kasganj va Fatexpur tumanlarida qayd etildi — har birida besh kishidan”, deyiladi xabarda.
Ma’lum qilinishicha, Chitrakut va Ambedkarnagar shaharlarida ikkita odam chaqmoq urishidan vafot etgan.
Gazeta ma’lumotlariga ko‘ra, shamol tezligi soatiga 60-100 kilometrgacha yetgan, momaqaldiroqning kuchayishi dushanbagacha davom etishi kutilmoqda. Hukumat mahalliy hokimiyat idoralariga halok bo‘lganlarning oilalariga zudlik bilan tovon puli to‘lashni topshirdi.
Ta’kidlanishicha, yomg‘irlar qishloq aholi punktlari va qishloq xo‘jaligi infratuzilmasiga jiddiy zarar yetkazgan. Uttar-Pradesh hukumati jabrlanganlarga moddiy yordam ko‘rsatilishini e’lon qilgan.
Qayd etilishicha, Jhansidagi Singar qishlog‘ida kuchli bo‘ron ko‘plab to‘tiqushlarning halok bo‘lishiga sabab bo‘lgan. Qishloq aholisining aytishicha, ibodatxona yonidagi katta pipal daraxti to‘tiqushlarning ko‘p sonli jamoasiga makon bo‘lgan ekan. To‘satdan boshlangan shiddatli ob-havo hodisasi katta vahimaga sabab bo‘lib, shoxlar bir-biriga urilib, uya qurgan ko‘plab to‘tiqushlarni jarohatlagan. Tuman o‘rmon xo‘jaligi boshlig‘i J.B.Shendening ma’lum qilishicha, 70 ta to‘tiqushning o‘limi tasdiqlangan, 30 ga yaqini jarohatlanib, tibbiy yordam olgan.
Bundan avval Hindiston poytaxtiga yog‘gan kuchli jala va yirik do‘l oqibatida besh kishi halok bo‘lgani ma`lum qilingandi.
Avstraliyaning janubi-sharqida yog‘gan yomg‘ir qisqa muddatli toshqinlarni keltirib chiqargan, ko‘plab shaharlarni tashqi dunyodan uzib qo’ygan va aholi uy tomlarida jon saqlayotgani xabar qilingandi.
Izoh (0)