Yil boshidan beri Hindiston deyarli har kuni tabiiy ofatlarga duch kelmoqda

Yil boshidan buyon tabiiy va kutilmagan ofatlar Hindistonning turli hududlariga deyarli har kuni o‘z ta’sirini o‘tkazmoqda, deb yozadi “TASS”.

Qayd etilishicha, Hindistonda 2023-yilning yanvaridan sentyabriga qadar o‘tgan kunlarning 86 foizida ekstremal ob-havo sharoiti kuzatilgan.

“Oqibatda 2 923 kishi halok bo‘ldi, qariyb 2 million gektar maydon va 80 ming uy vayron bo‘ldi, 92 mingdan ortiq hayvonlar nobud bo‘ldi”, — deyiladi xabarda.

Eng ko‘p ekstremal ob-havo hodisalari Madhya-Pradesh shtatida qayd etilgan – 138 ta. O‘lim holatlari eng ko‘p Bixar (642), Himachal-Pradesh (365) va Uttar-Pradesh (341) shtatlarida kuzatilgan.

Mamlakatda eng keng tarqalgan tabiiy ofatlar kuchli momaqaldiroq va bo‘ronlar bo‘lib, ular yilning 273 kunidan 176 kunida kuzatilgan va 711 kishining o‘limiga sabab bo‘lgan. Kuchli yomg‘ir, suv toshqini va ko‘chkilar esa Hindistonga eng katta zarar keltirib, 1 900 dan ortiq odamning hayotiga zomin bo‘ldi.