Himolay tizmasida 13-iyun kuni suv toshqinlari va ko‘chkilar yuz berishi oqibatida 2400 nafar sayyoh tog‘lar orasida qolib ketgan. Bu haqda Hindiston mahalliy nashrlariga tayanib, CNN xabar berdi.
Manbada aytilishicha, tabiiy ofat Himolay tizmasining Hindiston va Nepal hududlaridagi qismlarida kuzatilgan. Juda ko‘p yog‘ingarchilik oqibatida suv toshqinlari yuz berib, adirliklarda tuproq ko‘chishi kuzatilgan.
Ofatdan eng ko‘p zararlangan hudud Hindiston shimoli-sharqidagi Sikkim shtati ekanligi maʼlum qilingan. Hozirgacha shtatda kamida 6 kishi halok bo‘lgan.
“So‘nggi 36 soatdan beri tinimsiz yomg‘ir yog‘moqda. Biz hududda jasadlarni topdik va oilalariga topshirdik”, — degan Sikkim tumani sudyasi Xem Kumar.
Toshqinlar Nepalning Koshi provinsiyasida ham vayrongarchiliklar keltirib chiqargan. Hozirgacha 4 ta jasad aniqlangan.
Toshqin va ko‘chkilar Nepal hamda Hindistonda 100 dan ortiq binoni yuvib ketgan. Xalqaro yo‘llar tuproq bilan to‘silib qolgani bois shtatlarga kirish imkonsiz bo‘lib qolgan.
Nepal rasmiylari favqulodda vaziyat oqibatida 2400 nafar sayyoh tog‘lar orasida qolib ketganini maʼlum qilgan. Hududlarda xavf darajasi saqlanib turgani bois ayni damda qutqaruv guruhlari yuborish ham imkonsiz. Hukumat mamlakatga kirib kelayotgan sayyohlarni vaziyat tinchiguncha shaharlarni tark etmaslikka chaqirgan.
Katmandudagi maʼmuriyat yaqin bir hafta ichida viloyatlarga boradigan yo‘llarni qayta ochish imkoni yo‘qligini aytgan. Hindiston bilan birga Himolay tizmasida yo‘qolganlarni topish uchun havo-qutqaruv operatsiyalari tashkil etilishi bildirilgan.
Izoh (0)