Avstraliyaning janubi-sharqida yog‘gan yomg‘ir chorshanba kuni qisqa muddatli toshqinlarni keltirib chiqardi va ko‘plab shaharlarni tashqi dunyodan uzib qo’ydi. Bu haqda Reuters xabar qilmoqda.
Natijada aholining ba’zilari uylarining tomiga chiqishga majbur bo‘lgan. Daryo sathi ko‘tarilgani sabab Avstraliya rasmiylari tezkor evakuatsiya qarorini qabul qilgan.
Ta’kidlanishicha, Yangi Janubiy Uels (Avstraliyaning eng zich aholiga ega shtati)dagi Hanter va Mid Nort Kost eng ko‘p zarar ko‘rgan mintaqa bo‘ldi. Ayrim hududlarda so‘nggi 24 soat ichida 4 oylik yomg‘ir miqdoriga teng yog‘ingarchilik kuzatilgan.
“Yomg‘ir juda kuchli yog‘moqda va hali to‘xtagani yo‘q. Yerlar namlikka to‘yingani sabab daryolar toshib ketmoqda”, dedi Yangi Janubiy Uels favqulodda vaziyatlar xizmati vaziri Jixod Dib jurnalistlarga bergan intervyusida.
Avstraliya Meteorologiya byurosining so‘nggi ma’lumotlariga ko‘ra, ayrim hududlarga keyingi 24 soat ichida 300 mm (12 dyuym) gacha yomg‘ir yog‘ishi mumkin, bu may oyi uchun o‘rtacha miqdordan uch barobar ko‘p.
Ijtimoiy tarmoqlarda tarqalgan suratlarda ba’zi fuqarolar uylarining ichida tizzasigacha suv ichida qutqaruvchilarni kutib o‘tirgani ko‘rish mumkin.
Sidneydan 300 km (186 mil) shimolda joylashgan Tari va Glentorn shaharlarida fuqarolar ayvonlar va tomlarda qamalib qolgan. Favqulodda xizmatlar tun bo‘lishiga qaramay, qayiq va havo orqali hududga yetib borishga harakat qilgan.
Yangi Janubiy Uels favqulodda vaziyatlar xizmati rahbari Mayk Vasingning ta’kidlashicha, qutqaruvchilar asosiy e’tiborni zaif va uyini tark eta olmagan shaxslarni qutqarishga qaratishmoqda.
“Hozirgi diqqat — aynan tomlarda yoki uyining ikkinchi qavatida qolib ketgan shaxslarga qaratilgan”, deydi u.
Izoh (0)