Hindiston va Bangladeshda “Remal” sikloni oqibatida halok bo‘lganlar soni 28-may kuni 36 nafarga yetdi. Bu haqda Hindiston Tabiiy ofatlarni boshqarish vazirligi tarqatgan xabarga asoslanib, CNN nashri xabar berdi.
Manbada aytilishicha, 1 milliondan ortiq fuqaro tabiiy ofat hududlaridan ko‘chirib ketilgan. Hindiston va Bangladeshda “Remal” tropik sikloni, kuchli yomg‘ir va shamol aholini qochishga majbur qilgan.
Hindiston tabiiy ofatlarni boshqarish vaziri Javed Xon aytishicha, birgina Bengaliya shtatining o‘zida 7 nafar fuqaro halok bo‘lgan. Shuningdek, Hindiston janubidagi Telangana shtatida yetti nafar, shimoli-sharqdagi Mizoram shtatida yana 12 nafar hamda Bangladeshda 10 kishi halok bo‘lgani xabar qilingan.
Hodisa oqibatida millionlab fuqarolar elektr tarmog‘idan uzilib qolgan. Daraxtlar ag‘darilishi va binolar vayron bo‘lishi oqibatida xalqaro magistrallar to‘silib qolgan.
“Remal” sikloni markazi Kalkutta shahridan taxminan 80 kilometr janubi-sharqda ekani bildirilgan. Tezligi esa soatiga 135 kilometrga yetgan. Ayni damda siklon G‘arbiy Bengaliya shtati qirg‘oqlari bo‘ylab shimolga tomon harakatlanmoqda.
Bangladeshdagi Mongla va Payra dengiz portlari yopilgan. Hukumat baliqchilar va boshqa tijorat kemalariga suvga chiqmaslikni buyurgan.
Oldinroq Janubiy Osiyoda yuzaga kelgan “Remal” sikloni oqibatida Hindiston sharqi va Bengaliyada favqulodda vaziyat eʼlon qilingani haqida xabar berilgan edi. Ushbu kabi siklonlarning Bengaliya ko‘rfazida yuz berishi iqlim o‘zgarishining oqibati ekani maʼlum qilingan.
Izoh (0)