Hindistonning sharqiy Bixar shtatida 9-aprel kuni yashin urishi oqibatida 22 kishi halok bo‘ldi. Ularning soni ortishi mumkin. Bu haqda Sinxua xabar berdi.
Shtatda kuchli yomg‘ir, momaqaldiroq va yashin kuzatilgan. Sakkizta tumanda qurbonlar qayd etilgan. Bixar bosh vaziri ofisi to‘rtta tumanda yashin urishi oqibatida 13 kishi halok bo‘lganini ma’lum qilgan. Chaqmoq urgan vaqtda odamlar dalada bo‘lgan.
Ushbu hodisa Bixarda yashin urishi oqibatida o‘lim holatlari tobora ko‘payib, xavfli tus olayotganini ko‘rsatmoqda. Jumladan, birgina 2023-yilning o‘zida shtatda 275 ta yashin bilan bog‘liq o‘lim holati qayd etilgan. Bixar bosh vaziri Nitish Kumar halok bo‘lganlarning oilalariga hamdardlik bildirgan va ularga moddiy yordam ajratilishini e’lon qilgan.
Bosh vazir halok bo‘lganlarning yaqinlariga 400 ming rupiy (4649 AQSH dollari) miqdorida kompensatsiya to‘lanishini e’lon qildi, dedi hukumat vakili.
Kumar aholiga yomon ob-havo sharoitida hushyor bo‘lish va favqulodda vaziyatlar boshqarmasi tomonidan berilgan ko‘rsatmalarga amal qilishni tavsiya qilgan.
Hindiston meteorologiya departamenti 13-aprelgacha Andxra Pradesh shtatida chaqmoq, momaqaldiroq va kuchli shamol bo‘lishi haqida prognoz e’lon qildi. Mamlakatda har yili musson mavsumi boshlanishi bilan yuzlab odamlar yashin urishi oqibatida halok bo‘ladi.
Izoh (0)