Ҳиндистоннинг Уттар-Прадеш штатида момақалдироқли жала оқибатида камида 45 киши ҳаётдан кўз юмди. Бу ҳақда Times of India газетаси хабар бермоқда.
“Чоршанба куни кечқурун ва пайшанба куни тонгда Уттар-Прадешнинг бир нечта туманларида ёққан момақалдироқли жала оқибатида камида 45 киши ҳалок бўлди. Энг кўп қурбонлар Касганж ва Фатехпур туманларида қайд этилди — ҳар бирида беш кишидан”, дейилади хабарда.
Маълум қилинишича, Читракут ва Амбедкарнагар шаҳарларида иккита одам чақмоқ уришидан вафот этган.
Газета маълумотларига кўра, шамол тезлиги соатига 60-100 километргача етган, момақалдироқнинг кучайиши душанбагача давом этиши кутилмоқда. Ҳукумат маҳаллий ҳокимият идораларига ҳалок бўлганларнинг оилаларига зудлик билан товон пули тўлашни топширди.
Таъкидланишича, ёмғирлар қишлоқ аҳоли пунктлари ва қишлоқ хўжалиги инфратузилмасига жиддий зарар етказган. Уттар-Прадеш ҳукумати жабрланганларга моддий ёрдам кўрсатилишини эълон қилган.
Қайд этилишича, Жҳансидаги Сингар қишлоғида кучли бўрон кўплаб тўтиқушларнинг ҳалок бўлишига сабаб бўлган. Қишлоқ аҳолисининг айтишича, ибодатхона ёнидаги катта пипал дарахти тўтиқушларнинг кўп сонли жамоасига макон бўлган экан. Тўсатдан бошланган шиддатли об-ҳаво ҳодисаси катта ваҳимага сабаб бўлиб, шохлар бир-бирига урилиб, уя қурган кўплаб тўтиқушларни жароҳатлаган. Туман ўрмон хўжалиги бошлиғи Ж.Б.Шенденинг маълум қилишича, 70 та тўтиқушнинг ўлими тасдиқланган, 30 га яқини жароҳатланиб, тиббий ёрдам олган.
Бундан аввал Ҳиндистон пойтахтига ёғган кучли жала ва йирик дўл оқибатида беш киши ҳалок бўлгани ма`лум қилинганди.
Австралиянинг жануби-шарқида ёғган ёмғир қисқа муддатли тошқинларни келтириб чиқарган, кўплаб шаҳарларни ташқи дунёдан узиб қўйган ва аҳоли уй томларида жон сақлаётгани хабар қилинганди.
Изоҳ (0)