Xitoyning Shanxay shahrida joylashgan Gogogym nomli sog‘lomlashtirish markazida itlar uchun maxsus trenajyor zali tashkil etildi.
Singapurning Health Petcare brendiga tegishli ushbu markazga oid videolar ijtimoiy tarmoqlarda tez orada mashhur bo‘lib ketdi. Videoda itlarning yugurish yo‘lakchasida mashq qilayotgani aks etgan.
Markazning asosiy maqsadi uy hayvonlarining sog‘lom turmush tarzini qo‘llab-quvvatlash va turli kasalliklarning oldini olishga ko‘maklashishdir.
Trenajyor zalida fitnes zonasi, spa-salon, reabilitatsiya markazi, massaj xonasi va hayvonlar uchun do‘konlar mavjud. Shuningdek, har bir itning ehtiyojlariga qarab alohida mashg‘ulot rejasi tuzadigan professional murabbiylar ham jalb etilgan.
Xitoy ijtimoiy tarmoqlaridagi foydalanuvchilardan biri ushbu yangilikka hazilomuz tarzda shunday munosabat bildirdi:
“Endi itlar sport zaliga bora olishadi, hattoki turmush qurishlari ham mumkin. Bu hayvonlarga bo‘lgan g‘amxo‘rlik qanchalik rivojlanganini ko‘rsatadi”
Aprel oyida fitnes markazi itlar o‘rtasida eng go‘zal “fitnes model” tanlovini e’lon qildi. G‘oliblarga sog‘lomlashtirish markaziga bepul abonement taqdim etdi. Hozirda sport zali sinov rejimida faoliyat yuritmoqda. Rasmiy ochilish marosimi joriy yil iyun oyiga rejalashtirilgan.
Izoh (0)