108 yoshli yaponiyalik Shitsui Xakoisi sartarosh bo‘lib ishlayotgan dunyodagi eng keksa ayol deb tan olindi. U 90 yildan ortiq umri davomida o‘zining sevimli kasbi bilan shug‘ullangan. Bu haqda Ginnesning rekordlar kitobining rasmiy sayti xabar qildi.
Xakoisi sartaroshlik kasbni 14 yoshidan o‘rgana boshlagan.
“Men o‘zimdan kattaroq shogirdlarni iloji boricha tezroq ortda qoldirib, ulardan qobiliyatim bilan o‘zib ketishni istar edim, shuning uchun juda ko‘p ishladim va qo‘limdan kelgancha mehnat qildim”, deya eslaydi u.
Xakoisi rasman 1936-yilda sartaroshlik litsenziyasini olgach, professional sifatida ishlay boshladi. Uch yil o‘tgach, ayol va uning turmush o‘rtog‘i birgalikda o‘zlarining go‘zallik salonini ochdi. Biroq sartaroshxona faoliyati uzoq davom etmadi va ikkinchi jahon urushi paytida ularning binosi vayron bo‘ldi.
Oradan uzoq yillar o‘tgach, ikki farzandining tarbiyasi bilan shug‘ullanayotgan Xakoisi yangi sartaroshxona ochishga qaror qildi. Afsuski, uning turmush o‘rtog‘i urushda vafot etgan edi.
Shitsui xonim o‘z ishini yanada rivojlantirishda davom etmoqda. U mijozlarga xizmat ko‘rsatish bilan birga ish jarayonlarini boshqaradi. Ammo keksa ayolning tizzasidagi chidab bo‘lmas og‘riqlar tufayli o‘zi istagandek ko‘proq ishlay olmaydi.
Uning fikricha, uzoq umr ko‘rishga faol hayot tarzi sabab bo‘lgan. Xakoisi 70 yoshidan beri qat’iy jismoniy mashqlar va parhez rejimiga amal qiladi.
“Ba’zilar meni ko‘rish uchun uzoqdan tashrif buyuradi, shuning uchun men imkon qadar faoliyatimni davom ettirishni istayman”, deydi rekordchi.
Izoh (0)