Lego “Formula-1” poygachilari uchun haqiqiy o‘lchamdagi sportkarlarni ishlab chiqdi. Bu haqda konstruktorlar ishlab chiqaruvchi kompaniyaning X sahifasida xabar berildi.
Har bir yaratilgan mashina taxminan bir tonna og‘irlikda bo‘lib, 400 mingdan ortiq qismlardan iborat. Lego muhandislariga “Formula-1”ning haqiqiy avtomobillaridan silliq yuzali poyga shinalari berildi. Shuningdek, mutaxassislar haqiqiy sportkarning dizayni, tashqi bezaklari va rangini iloji boricha birdek aniq takrorlashga harakat qilishdi.
Har bir avtomobilni yig‘ish Lego xodimlaridan anchagina kuch va vaqt talab qildi: har bir mashinani tayyorlashda 26 nafar mutaxassis jami 22 ming soat mehnat qildi.
“Ular soatiga 20 kilometr tezlikka chiqishi mumkin deyishyapti — bu juda zo‘r tezlik! Qiziq, lego avtomobili bilan to‘qnashsa bo‘larmikan? Har birini qurishga minglab soat ketgan deysizmi? Yo‘q, unda yaxshisi unga urilib ketmaslik kerak. Ochig‘i, lego avtosi men kutganimdan ham chiroyliroq ko‘rinishga ega ekan!” dedi poyga ishtirokchilaridan biri Jorj Rassell.
Mazkur mashinalar faqatgina ko‘rgazmali bezak emas, u haqiqiy harakatlanish vositasi sifatida ham ishlatilishi mumkin.
Poygachilar Lego mashinalari funksiyalaridan foydalanib, 5,412 kilometr uzunlikdagi trek bo‘ylab parad o‘tkazishdi. Biroq ayrim avariyalar ham yuz berdi, chunki bunday sport avtomobillari bilan manyovr qilish oson bo‘lmagan.
Izoh (0)