Хитойнинг Шанхай шаҳрида жойлашган Gogogym номли соғломлаштириш марказида итлар учун махсус тренажёр зали ташкил этилди.
Сингапурнинг Health Petcare брендига тегишли ушбу марказга оид видеолар ижтимоий тармоқларда тез орада машҳур бўлиб кетди. Видеода итларнинг югуриш йўлакчасида машқ қилаётгани акс этган.
Марказнинг асосий мақсади уй ҳайвонларининг соғлом турмуш тарзини қўллаб-қувватлаш ва турли касалликларнинг олдини олишга кўмаклашишдир.
Тренажёр залида фитнес зонаси, спа-салон, реабилитация маркази, массаж хонаси ва ҳайвонлар учун дўконлар мавжуд. Шунингдек, ҳар бир итнинг эҳтиёжларига қараб алоҳида машғулот режаси тузадиган профессионал мураббийлар ҳам жалб этилган.
Хитой ижтимоий тармоқларидаги фойдаланувчилардан бири ушбу янгиликка ҳазиломуз тарзда шундай муносабат билдирди:
“Энди итлар спорт залига бора олишади, ҳаттоки турмуш қуришлари ҳам мумкин. Бу ҳайвонларга бўлган ғамхўрлик қанчалик ривожланганини кўрсатади”
Апрель ойида фитнес маркази итлар ўртасида энг гўзал “фитнес модел” танловини эълон қилди. Ғолибларга соғломлаштириш марказига бепул абонемент тақдим этди. Ҳозирда спорт зали синов режимида фаолият юритмоқда. Расмий очилиш маросими жорий йил июнь ойига режалаштирилган.
Изоҳ (0)