Xitoylik rassom “G‘arbga sayohat” serialidagi mingdan ortiq qahramon obrazlarini tuxum po‘stlog‘iga mohirona o‘yib ishlagach, Ginnesning rekordlar kitobiga kiritildi. Bu haqda Ginnes rekordlari rasmiy saytida xabar berildi.
Pekinlik Ma Chao ismli erkak 35 yoshida hayotini tubdan o‘zgartirishga qaror qildi: u 3D dizaynerlik ishini tashlab, tuxum po‘stlog‘iga rasmlar chizish bilan shug‘ullana boshladi. Sobiq rassom hozirda nihoyatda nozik va murakkab ish bilan shug‘ullanib kelmoqda. U allaqachon 1040 ta tuxum po‘chog‘iga gravyuralar o‘yib, “G‘arbga sayohat” qahramonlarining barchasining portretini chizgan va “Eng katta o‘ymakorlik kolleksiyasi” yo‘nalishida Ginnes rekordchisiga aylangan.
Tuxum po‘stlog‘i o‘ymakorligi — juda nozik san’at turi bo‘lib, qalinligi atigi 0,3 millimetr bo‘lgan o‘ta mo‘rt yuzaga murakkab naqshlar tushirishdan iborat. Tuxum biroz yengil harakatdan ham sinib ketishi mumkin, shu sabab rassom gravyurani o‘yish paytida qo‘lini qimirlatmasdan ishlashga majbur. Ishni qiyinlashtiruvchi yana bir omil — tuxumning yumaloq shaklga ega bo‘lishidir. Portret chizishda yuzaning notekis bo‘lishini ham hisobga olish kerak.
Ma Chao tasvirlari shu darajada detallashtirilganki, hatto qahramonlar kiyimidagi mo‘yna ham aniq ifodalangan. Bu naqshlar go‘yo mikroskop ostida ishlangandek tuyuladi. Ammo muallif faqat o‘z ko‘rish qobiliyatiga tayanib mehnat qilgan.
Rassomning tan olishicha, tuxum po‘stlog‘i o‘ymakorligi san’atini o‘rganish oson bo‘lmagan. Bu yo‘lda u ko‘plab kitoblar ustida tunlarni bedor o‘tkazgan, ushbu ishga qiziqqan insonlar bilan muloqot qilgan, qo‘lida pichoq bilan cheksiz mashq qilgan va ko‘plab tuxum po‘choqlarini sindirgan.
Ma’lumot uchun, “G‘arbga sayohat” seriali 1986-yilda ekran yuzini ko‘rgan va XVI asrda yozilgan shu nomdagi romanga asoslangan Xitoy serialidir. Asarda buddist rohib Syuanszanning Hindistonga qilgan sayohati haqida hikoya qilinadi. 100 bobdan iborat asar Xitoy an’anaviy adabiyotining “to‘rt buyuk romani” sirasiga kiradi. Uning asosida suratga olingan serial esa mamlakatda muntazam ravishda televideniyeda namoyish etiladi.
Tuxum po‘stlog‘i o‘yma san’ati esa Xitoyda Min va Sin sulolalari davridan beri mavjud bo‘lib, bugungi kunda unutilgan san’at turiga aylanib bormoqda. Ammo mamlakatda uni qayta tiklashga harakat qilinmoqda. Masalan, 2023-yilda Gansu provinsiyasidagi Lanchjou nomli tabiiy resurslar atrof-muhit universitetining etnik hunarmandchilik kolleji dasturiga tuxum o‘ymakorligi fani yangi dars sifatida kiritilgan.
Izoh (0)