“Oqim” multfilmining muvaffaqiyatidan so‘ng Braziliyada mahalliy aholi hayvonlar saqlanadigan boshpanalardan qora mushuklarni tez-tez asrab olishni boshladi. Bu haqda “Pravila jizni” xabar berdi.
Ushbu trendni X tarmog‘i foydalanuvchilaridan biri boshlab berdi. U ikkita qora mushuk egalarini izlayotganligi haqida post qoldirdi. Xabarda u mushukchalarni “Flouga o‘xshaydi” deb atadi va “Oqim” bosh qahramonining “Oskar” haykalchasini ushlab turgan suratini ilova qildi.
Uning posti tez orada ko‘plab foydalanuvchilar orasida tarqala boshladi: insonlar nafaqat ko‘proq uy hayvonlarini asrab ola boshladi, balki mushuklarini Flou deb atay boshladi.
“Bugun men yana uch nafar odamning qora mushuk boqib olganini va ularga Flou deb nom berganlarining guvohi bo‘ldim. Endilikda har safar ko‘chada qora mushukka dich kelganimda miyamga avtomatik tarzda: “Darhaqiqat, bu bizning mitti Flouzi-ku” degan o‘y keladi”, deb yozadi X foydalanuvchilardan biri.
Braziliya hayvonlar huquqlarini himoya qilish tashkiloti — Ampara Animal Institute vakilining so‘zlariga ko‘ra, Gints Zilbalodis tomonidan chizilgan surat qora mushuklar taqdirini kezki o‘zgartirib yuboradi. “Oqim” animatsion filmi uzoq vaqtdan beri salbiy va adolatsiz munosabatga duch kelgan qora mushuklarning asrab olinishiga turki bo‘lyapti va ularga bo‘lgan qiziqish va aholining mehri ortib boryapti.
Latviyalik rejissyor Gints Zilbalodisning “Oqim” to‘liq metrajli animatsion filmi Eng yaxshi mustaqil to‘liq metrajli film” va “Eng yaxshi ssenariy” nominatsiyasida “Oskar” mukofotiga sazovor deb topildi. Bu Latviya tarixidagi ilk kino akademiyasi mukofotidir.
Multfilm syujeti markazida suv bosgan dunyoga tushib qolgan qora mushuk turadi. Uning uyi vayron bo‘lgach, mushuk kichik qayiqda safarga chiqadi. Yo‘lda turli hayvonlarga: kapibara, lemur, retriver it va g‘alati kotib qush kabilarga duch keladi. Ular tamoman boshqa-boshqa bo‘lsalar-da, qiyinchiliklarni yengish uchun bir-birlariga ishonishni va birgalikda ishlashni o‘rganishlari kerak bo‘ladi. Ularning safari kutilmagan kashfiyotlar, xavf-xatarlar va do‘stlik hamma narsadan ustun keladigan lahzalarga to‘la bo‘ladi.
Ushbu multfilmda hech qanday so‘zlar va dialog ishlatilmagani bilan ham ajralib turadi. “Oqim” nafaqat tabiat go‘zalligi va qudratini namoyish etadi, balki dunyo inqirozga yuz tutganda hamjihatlikning yuqori ahamiyatga ega ekanligini yodimizga soladi.
Izoh (0)