“Sumerki” filmi va “Yaxshi alomatlar” seriali yulduzi, uelslik aktyor Maykl Shin 900 nafar vatandoshlarining 1 million funt sterling (deyarli 1 million 290 ming AQSH dollari) miqdorda qarzlarini to‘lab berdi. Ushbu summadan 100 ming funt sterling qismi aktyorning shaxsiy mablag‘idir.
Shin 100 ming funt sterling bilan moliyaviy qiyinchiliklarga duch kelgan odamlarga yordam berish uchun maxsus fond tashkil qilgan. Uning ezgu amali yaqinda premyerasi bo‘lib o‘tadigan “Maykl Shinning million funtlik lotereyasi” nomli hujjatli film uchun asos bo‘ldi.
“Eng hayratlanarlisi, odamlar hashamatli buymlarni emas, balki hayot uchun zaruriy narsalarni sotib olish uchun kredit olishgan va overdraftlardan foydalanishgan. Men to‘lay olgan qarzlar ichida avtokredit, uy krediti hamda overdraftlar o‘rin olgan”, dedi Shin The Hollywood Reporter nashriga.
Aktyor kam ta’minlangan aholi qatlamining moliyaviy ahvolidan xavotirda ekanini hamda insonlar istamagan holda kreditlar tuzog‘iga tushib qolayotganini qayt etdi. Uning BBC ning The One Show dasturiga bergan intervyusida aytishicha, qarzlarni to‘lab beruvchi kompaniya yaratish loyihasi imkon qadar samarali bo‘lishi muhim bo‘lgan:
“Odamlarning qarzlari maxsus paketda birlashtiriladi, so‘ng qarz oluvchi kompaniyalar bu paketlarni sotib oladi. Keyinroq ularni boshqa qarz oluvchi kompaniyalarga arzonroq narxda sotish mumkin bo‘ladi. Shu tarzda qarzdorlar soni o‘zgarmay qolsa ham, qarzga egalik qiluvchilar uni har safar yanada kamroq pulga sotishlari mumkin bo‘ladi”, dedi aktyor.
“Qarzdan qutulish nihoyatda qiyin masala. Shuning uchun men ushbu global muammo mavjudligini insonlarga bildirish hamda uni hal qilish mumkinligini ko‘rsatish uchun ushbu loyihani o‘z bo‘ynimga oldim. Biz hammamiz vaziyatni yaxshi tomonga o‘zgartirishga harakat qildik”, deya qo‘shimcha qildi Shin.
Maykl Shin xayriya ishlariga mukkasidan ketgan aktyorlardan, bu ishi uni bir vaqtlar uni deyarli bankrotlikka olib kelgan. 2019-yilda aktyor Buyuk Britaniya va AQShdagi ko‘chmas mulklarini sotib, Uelsdagi kam ta’minlangan bolalar uchun futbol chempionati o‘tkazib bergan.
Izoh (0)