Britaniyaning Ekseter shahridagi Bearnes Hempton Littlewood kim oshdi savdosida g‘ayrioddiy shaklga ega — sharsimon tovuq tuxumi sotuvga qo‘yildi. Lot 420 funt sterling narxda (taxminan 530 dollar) xaridorga taqdim etildi.
“Milliardlar ichida bir marta uchraydigan” deb atalayotgan tuxumni o‘tgan yilning dekabr oyida Somerset yaqinidagi Fenton fermasida ishlaydigan Elison Grin ismli ayol topib oldi. U “Independent” nashriga bunday shakldagi tuxumni hech qachon ko‘rmaganini ta’kidladi. 57 yoshli Grin fermada uch yildan beri faoliyat olib boradi va kuniga 30 mingga yaqin tuxumning qayta ishlanishiga javobgar hisoblanadi.
“Bir kuni vafot etsam, odamlar meni Google’da “dumaloq tuxum” so‘zlari bilan izlaydi va internetda mening yuzimni ko‘rishadi”, deya hazil qiladi Grin xonim.
Shunga o‘xshash yana bir ideal dumaloq shaklga ega tuxum Angliyadagi kim oshdi savdosida 200 funt sterlingga sotilganini bilgach, ayol ferma rahbaridan ularning tuxumini ham kim oshdi savdosiga qo‘yishi mumkinligini so‘ragan.
Lot savdosidan tushgan mablag‘ Grin xohlaganidek, xayriya tashkilotlariga o‘tkaziladi. Xaridorning ismi esa oshkor qilinmagan.
Izoh (0)