Toshkent shahar hokimi Shavkat Umurzoqov 14-avgust kuni prezident ishtirokidagi taqdimotdan so‘ng poytaxtda chiqindilarni qayta ishlash tizimini raqamlashtirish, chiqindilarni qayta ishlash bilan shug‘ullanuvchi “Maxsustrans” korxonasining moliyaviy ahvoli va bu boradagi rejalar haqida gapirdi.
Hokim “O‘zbekiston 24” telekanaliga bergan intervyusida chiqindilarni olib chiqib ketish bilan shug‘ullanuvchi “Maxsustrans” davlat unitar korxonasining “moliyaviy ahvoli juda yomon” ekanini hamda kompaniya 2022−2023-yillarda 45 milliard so‘m zarar ko‘rganini maʼlum qildi.
“Mahallalarda bir kunlab, ikki kunlab axlat qolib ketar ekan va umuman axlat soladigan qurilmalar yetarli emas ekan. Buning yechimi faqat raqamlashtirish”, deya taʼkidlagan Shavkat Umurzoqov.
Qayd etilishicha, Olmazor tumanidagi mahallalarda chiqindi tashish jadvaliga rioya etilishini nazorat qilish bo‘yicha “Toza Poytaxt” platformasi sinov tariqasida ishga tushirilgan. 1-sentyabrga qadar tizim Toshkent shahrining barcha tumanlarida joriy etiladi.
Bundan tashqari, raqamlashtirish orqali yoqilg‘idan 3 milliard so‘mdan ortiq iqtisod qilingan, 34 turdagi chiqindi tashish texnikalari xarid qilinib, chiqindi tashuvchi haydovchilarning oylik maoshlari oyiga 4 million so‘mdan 8 million so‘mgacha oshirilgan. Natijada chiqindilarni olib chiqishning kunlik hajmi qariyb 30 foizga oshdi.
Izoh (0)