Xitoyda ajrim bo‘yicha sud ishlaridan birida ayol sobiq turmush o‘rtog‘idan ro‘zg‘or yumushlarini bajarib kelgan yillari uchun 7 ming dollar miqdorda pul so‘radi. Sud unga besh baravar ko‘proq miqdorda tovon puli tayinladi. Bu haqda The China Morning Post nashriga tayanib “Pravila jizni” xabar berdi.
Er-xotinning ajrim jarayoni 2024-yil oxirida boshlangan. Ma’lum bo‘lishicha, ular 2011-yilda turmush qurgan va ma’lum vaqtdan so‘ng qiz farzandli bo‘lgan. Juftlik 2022-yil oktyabr oyida farzandining taʼlim olishi mavzusida qattiq bahslasha boshlagan.
Ajrim to‘g‘risidagi arizasida Xu ismli ayol qiziga vasiylik qilish huquqini olish, umumiy mulkni teng miqdorda bo‘lishishdan tashqari, nikoh davrida bajargan barcha uy ishlari uchun 7000 dollar tovon puli to‘lashni talab qilgan. Bunga sabab sifatida ayol birga yashagan vaqtlarida hech kim unga yordam bermagani hamda barcha uy yumushlarini bir o‘zi bajarganligini aytgan.
Sud jarayonida “Uydagi barcha ishlar er-xotin o‘rtasida teng taqsimlanishi kerak”, dedi sudya yordamchisi. Chunki Xitoyning fuqarolik kodeksiga ko‘ra, nikohda bo‘lgan tomonlardan biri farzandlarga g‘amxo‘rlik qilishda ko‘proq ish va mas’uliyatni o‘z zimmasiga olsa, ajrim vaqtida ikkinchi tomon unga moddiy yordam berishi shart. Shuning uchun ayolga qonunga muvofiq tarzda 35 ming dollar tovon puli tayinlandi va qarorga hech kim e’tiroz bildira olmaydi.
Izoh (0)