Xitoyning sharqiy qismida joylashgan Tyansu provinsiyasida yashovchi ayol o‘zining homilador ekanligini bola 34 haftalik bo‘lganidagina bildi. Bu xabardan bir kun o‘tib, unda to‘lg‘oq boshlandi va o‘g‘il farzand dunyoga keldi. Bu haqda South China Morning Post nashriga tayanib “Pravila jizni” xabar berdi.
O‘z yurtida Ting Ting taxallusi bilan go‘zallik va moda mavzularidagi bloger ayol uyida smartfondagi o‘yinni o‘ynab o‘tirgan vaqtda qon yo‘qota boshlagan. So‘ng kasalxonaga borganida shifokorlar uning homiladorligi haqida xabar berishgan. Homila esa 34 haftalik bo‘lgan.
“Men chaqaloqning yurak urishini eshitmagunimcha shifokorlarning gapiga ishonmadim”, deydi bloger.
Ertasi kuni ertalab u onasi bilan klinikaga qayta ko‘rikka keladi, ma’lum vaqt o‘tgach shifokorlar unga yaqin orada tug‘ruq boshlanish ehtimoli borligini aytadi. O‘sha kuni kechqurun kesarcha usuli bilan chaqaloq dunyoga keladi.
Ayol o‘zining homilador bo‘lganini tasavvuriga ham sig‘dira olmagan, chunki bundan avval u muntazam hayz ko‘rgan hamda homiladorlik belgilari — ko‘ngil aynishi, qorinning kattalashishi kabilarning birortasi namoyon bo‘lmagan. Ayol hatto homila harakatini ham sezmagan.
Bundan tashqari, o‘tgan bir necha oy davomida u uch marotaba homiladorlik testini o‘tkazgan va barcha natijalar manfiy bo‘lgan. Shu sababli ayol salomatligidan xavotir olmay, odatdagi hayotini davom ettirgan. U muntazam kech uxlashga yotar, tez-tez chekar va qahva iste’mol qilar edi:
“Men kundalik stressdan forig‘ bo‘lish uchun homiladorlarga mumkin bo‘lmagan mahsulotlarni iste’mol qilganman. Bolamni ko‘rganimda esa xayolimga birinchi kelgan xavotir — bu uning salomatligini tekshirish va g‘amxo‘rlik qilish edi. Avvalgi mas’uliyatsiz va xavfli kun tartibim uchun o‘zimni aybdor his qila boshladim”, dedi u.
Homiladorlikning birinchi haftalarida u faol turmush tarzini kechirgan: u do‘stlari bilan balandlikdan sakragan va xavfli attraksionlarda uchgan.
“Homiladorligimda qilgan ajablanarli amallarimni bajarmaslik uchun vaqtni orqaga qaytarishni istayman”, dedi bloger.
Chaqaloq dunyoga kelgach, u neonatal intensiv terapiya bo‘limiga yuborilgan. Oradan o‘n kun o‘tgach, bola butunlay sog‘lom holatda kasalxonadan chiqarilgan. Onaning so‘zlariga ko‘ra, uning o‘g‘li hozirda o‘zini yaxshi his qilmoqda va sog‘lig‘idan hech qanday shikoyatlari yo‘q.
Izoh (0)