Braziliyaning Pernambuko shtati fuqarosi Gamilton Taurino dunyodagi eng yaxshi kasb egasi ekanligiga davo qilishi mumkin: u uy hayvonlarini veterinarga olib borish yoki biror joyga yetkazib qo‘yish bilan shug‘ullanadi.
Bored Panda portaliga bergan intervyusida Taurino hayvonlar uchun taksi xizmati tashkil etish fikri qanday kelib qolgani haqida so‘zlab berdi. Kunlarning birida uning do‘sti itini veterinarga olib borishga rozi bo‘ladigan haydovchi topa olmaganini aytadi. Bir qarashda yoqimsiz bo‘lgan tajriba keyinchalik muvaffaqiyatli biznesning boshlanishiga sabab bo‘lgan.
Avvaliga Gamilton uchun uy hayvonlari egalari bilan til topishish qiyin kechgan va turli favqulodda vaziyatlarga duch kelgan:
“Hayvonlar begona odam — meni oldimda o‘zini yomon tutar, haydovchi mashinasiga o‘rganishi qiyin bo‘lar edi. So‘ng atrofdagi kasalxonalar va klinikalarni o‘rganib chiqib, qaysi biri 24 soatlik xizmatlarni taklif qilishini aniqlash kerak bo‘ldi. Shuningdek, uy hayvonlari uchun maxsus xavfsizlik kamarlari va ularni tashish uchun sumkalarni sotib oldim”, deydi Taurino.
Vaqt o‘tishi bilan noodatiy taksi biznesi rivojlanib, hozirda u doimiy mijozlarga ham ega. Ba’zi hayvonlar hatto mashinadan tushishni istamay, egasiga qaytishga shoshmaydi.
Gamilton mijozlar bilan tushgan suratlarni tez-tez Instagram’ga joylab boradi. Haydovchining eng noodatiy mijozlaridan biri dengiz cho‘chqasi bo‘lgan. Bir kuni hayvon, qafasidan qochib ketib, uzoq vaqt qidirilgan, so‘ng mashina o‘rindig‘ining ostiga yashiringan holda topilgan.
Izoh (0)