TikTok kutilmagan yangilikni joriy qildi: endilikda voyaga yetmagan foydalanuvchilar uchun kechki soat 22:00 dan keyin avtomatik tarzda nafas olish bo‘yicha meditatsiya mashqlari ishga tushadi. Tinchlantiruvchi musiqa ostida ekranda to‘g‘ri dam olish bo‘yicha foydali maslahatlar paydo bo‘ladi.
Kompaniyaning ta’kidlashicha, bu funksiya foydalanuvchilarning uyqu sifatini yaxshilash va tunda TikTok’da o‘tkaziladigan vaqtni qisqartirishga xizmat qiladi. Funksiya barcha foydalanuvchilar uchun mavjud bo‘lib, voyaga yetmaganlar ilovasida avtomatik tarzda ishga tushadi.
Katta yoshdagi foydalanuvchilar esa ushbu funksiyani ilova sozlamalaridagi “Ekran vaqti” bo‘limiga kirib, “Uyqu soati” rejimi orqali mustaqil tarzda yoqishlari mumkin. Shuningdek, ular eslatmalar uchun istalgan vaqtni avaldan belgilash imkoniga ega bo‘ladi.
Mazkur yangilik TikTok foydalanuvchilarning ruhiy salomatligini qo‘llab-quvvatlashga qaratilgan keng miqyosdagi tashabbusining bir qismidir. Dastur doirasida kompaniya 2,3 million dollar mablag‘ ajratgan. Ushbu sarmoya ta’limiy-tarbiyaviy va foydali kontent yaratish hamda ruhiy salomatlikning ahamiyati haqida xabardorlikni oshirishga yo‘naltiriladi.
Izoh (0)