Stendap komik, yumorist Mirshakar Fayzulloyev yaqin kunlarda katta sinov oldida turibdi. U 12 mingdan ziyod muxlisni sig‘dira oladigan Humo Arena muz saroyida “Chempion” nomli stendap konsert dasturini taqdim etadi. Yumorist “Daryo”ga bergan intervyusida konsert tayyorgarligi, o‘z sohasidan non topolmay qo‘shiq aytayotgani haqidagi mish-mishlar va shifokor bo‘lish orzusidan nega kechgani haqida gapirdi.
Chiptalar nima uchun qimmat?
— Ochig‘ini aytish kerak, chiptalar qimmat emas. Doim birinchi qator misol qilib olinadi-da, nega buncha qimmat, deyiladi. Birinchi qatorning narxi nega buncha qimmat, deydigan odam uchun qimmat emas. Lekin sizning pulingizga yarasha joylar ham bor — hamma joyda bir xil ovoz va ko‘rinish ta’minlanadi. Har bir loyihaning umumiy narxi bo‘ladi, bozor narxi shundan kelib chiqadi. Undan tashqari, ma’lum vaqtda biror narsaga sharoitingiz bo‘lmasligi normal holat. Bir safar bo‘lmasa, keyingisida o‘xshaydi, albatta. Yana alohida holatlarda promokodlar beriladi, masalan, “Sahna” stendap klubiga kelib turgan tomoshabinlar chegirma bilan xarid qilishi mumkin. “Alpomish”dagi konsertda talabalar uchun chegirma berilgandi, deydi yumorist.
Konsertga kirish kimlar uchun tekin? Mirshakarning eng katta orzularidan biri konsertda kimni ko‘rish?
— Ismimni rahmatli bobom qo‘ygan. U kishi adabiyotshunos bo‘lgan, 11 farzandning otasi edi. Bobom ko‘p adib va shoirlarning ismini bizga qo‘ygan — buni berkitadigan joyi yo‘q. Shoir Mirsaid Mirshakar sababli menga Mirshakar, akamga Mirsaid deb ism qo‘yilgan. Boshqa oila a’zolarimga ham adiblarning ismi qo‘yilgan, masalan, dadamning ismi Shuhrat, Alisher va Bobur esa amakilarimning ismi. Ammalarimda ham shunday. Aytgancha, “Chempion” konsertimda Mirshakar ismli barchaga kirish tekin, menga yozishsin, ular uchun alohida joy tayyorlangan. Bu joylar hatto sotuvda yo‘q. Taxminim bo‘yicha, O‘zbekistonda mingga yaqin Mirshakar ismli erkaklar bor. Bir necha yil avval dasturchi bo‘lib ishlab yurganimda 18 yoshdan katta 650 dan ortiq Mirshakar aniq bor edi. Ismimni aytsam ikkinchi marta “Mirshakar?” deya qayta so‘rashadi. Ba’zilar bilan tanishganimda esa ismimni to‘rt marta aytishga majbur bo‘laman. Hayotda kimnidir adash deb chaqirishni orzu qilaman. Umid qilamanki, konsertimda bu orzum amalga oshadi — kimgadir adash deyman. Mirshakarlar, kelinglar, hammamiz yig‘ilishimiz kerak, guruh ochib, choyxona qilib turamiz (kulib), deydi Mirshakar Fayzulloyev.
“Stendapdan non topolmay, endi qo‘shiqchilikka o‘tdimi?”
Muxlislar orasida muhokamalarga sabab bo‘layotgan yana bir holat — Mirshakar Fayzulloyev konsertida qo‘shiq aytayotgani. Ayrim muxlislar “Mirshakar ham aynibdi” degan fikrda. Xo‘sh, yumoristning o‘zi bu gap-so‘zlarga nima deydi?
— Stendapdan non topishim zo‘r, nolimayman. Qo‘shiq nega kerak edi? Ba’zi fikrlarni qo‘shiqda yetkazish osonroq. Sababi u fikrlarni to‘liq tushunish uchun konsertni bir-bir yarim soat davomida uzmay ko‘rish kerak. Konsert videosi chiqqanda doim bir o‘tirishda ko‘ringlar, bo‘lib-bo‘lib ko‘rgan bo‘lsangiz ham, boshqatdan to‘xtatmay ko‘rib qo‘ying, boshqacha ta’sir qiladi, deb ko‘p aytaman. Qo‘shiq uch daqiqa davom etadi, uni bir o‘zim kuylayotganim yo‘q. Juda iste’dodli musiqachilar bor, xalqaro darajada ishlaydigan insonlar bilan qilinayotgan ijod namunasi. Birortasining maqsadi gonorar emas. Mening maqsadim — o‘ylangan g‘oyani istalgan ko‘rinishda yetkazib berish, u xoh qo‘shiq bo‘lsin, xoh stendap, ahamiyati yo‘q. Ijodkor sifatida birgina niyatim — men qo‘l urgan mavzu ko‘proq odamga yetib borsin, dedi stendap komik.
Mirshakar Fayzulloyev bir vaqtlar yurist, aktyor, qo‘shiqchi bo‘lishni orzu qilgani haqida ko‘p bora aytib o‘tgan. Lekin san’atni orzu qilgan yigit nega dasturchi bo‘lib ketgan?
— Bir paytlar yurist bo‘laman, degan gap moda edi. Lekin hech qachon jiddiy tarzda yurist bo‘lish haqida o‘ylab ko‘rmaganman. Ammo hayotda shunday davr bo‘ladiki, kim bo‘lasan, deb so‘rashganda tinchgina, el qatori yurist bo‘laman, deb qo‘yish osonroq. Shifokor ham bo‘lish niyatim bo‘lgan, bu uchun hatto biologiyani chuqur o‘rganganman ham. Aktyorlikka ham qiziqish maktab davridan bo‘lgan, ammo bu tadbirlardagi kichik rollar bilangina cheklangan, xolos. Oilamizda kim bo‘lishingdan qat’i nazar, eng zo‘ri bo‘lishing kerak, kosibchilik qilsang ham, eng yaxshisi bo‘lsang, tirikchiliging ham zo‘r bo‘ladi, mijozing ham ko‘p bo‘ladi, deyishardi. Ertalab ishga ketayotganingda xursand bo‘lib ketsang va xursand bo‘lib ishdan qaytsang, demak, hayotda sen yutding, deydi yumorist.
Videoni to‘liq holda “Daryo” Lifestyle YouTube kanalida tomosha qilishingiz mumkin.
Izoh (0)