O'rni bilinayotgan Halima, sahnadagi bahor nafasi va maxsus grimxona: Yulduz Usmonovaning yangi konsertidan reportaj (video)

Fevral oyi Yulduz Usmonovaning muxlislari uchun haqiqiy bayram. Sababi O‘zbekiston, Qoraqalpog‘iston va Tojikiston xalq artisti 8-fevraldan 27-fevralga qadar 20 kunlik konsert dasturini muxlislari e’tiboriga havola qilmoqda. “Daryo” jamoasi konsertning ilk kuniga tashrif buyurib, eng qiziqarli va qaynoq jarayonlarni tasvirga oldi.

Konsertga Sirdaryo, Samarqand, Jizzax, Qashqadaryo, Qo‘qon va boshqa viloyatlardan, qolaversa, qo‘shni davlatlar Qozog‘iston va Qirg‘izistondan, Rossiyaning Moskva shahridan kelgan mehmonlar ham bo‘ldi.

Qish bo‘lishiga qaramay, Yulduz Usmonova har yilgidek sahnada bahor kayfiyatini barchaga his ettirdi. Sahna bezaklaridan tortib xonandaning liboslarigacha gullar bilan bezaldi.

To‘rt mingdan ziyod tomoshabinni o‘z bag‘riga sig‘dira oladigan san’at saroyida birorta ham bo‘sh o‘rindiq qolmadi — bu muxlislari xonandani qanchalik sevishidan darak.

“Xalqlar do‘stligi”ning grimxonalari esa Yulduz Usmonova uchun butkul o‘zgartirildi. Xonanda stilistining aytishicha, ular barcha ish qurollari bilan san’at saroyiga 20 kunga “ko‘chib kelishgan”.

Yulduz Usmonova sahnada muxlislari bilan gaplashayotganda kutilmaganda Botir Qodirov parda ortidan chiqib, “san’atdagi onasi”ga gullar taqdim etdi va xonandani navbatdagi konsert bilan tabrikladi.

— Bugun sahnada birga kuylamaymiz. Sahna ortida qanday yordam kerak bo‘lsa, qo‘llab-quvvatlab turamiz. Avvalgi konsertlarda duet kuylaganmiz, lekin hali alohida klip ishlanmadi.

Bu yil “Xalqlar do‘stligi”da konsert qo‘ymayman, boshqa narsani reja qilganmiz, muxlislar uchun ham sovg‘a bo‘ladi. Zo‘r TV binosida ramazon oyida bir tadbir qilishni rejalashtirdik. Joylar chegaralangan bo‘ladi, sababi u yerdagi joy katta emas. Uni ham konsert desa bo‘laveradi. Keyinchalik nasib qilgan paytda “Xalqlar do‘stligi”da ham konsert beraman, deydi Botir Qodirov.

Xonanda an’anaga sodiq qolgan holda navbatdagi konsertida ham so‘z ustasi Shukrullo Isroilovga boshlovchilik vazifasini ishonib topshirdi.

— Bugun sinov kuni, boshlanishi yomon emas. Doimgidek xushchaqchaq, sog‘ingan muxlislar yig‘ilgan. O‘tgan yili ham shu yerda ko‘rishgandik, birpasda bir yil o‘tib ketibdi, deb muxlislarga ham aytdim. Yulduz haqida uzoq gapirishning hojati yo‘q, u kimligini isbotlab qo‘ygan ayol. Bu ayolda “Dyurasel” batareyasi bor, “Qarimagin” va “Charchamagin” degan ikkita tabletka ichib yuradi, deb hazillashaman, deydi so‘z ustasi.

Shukrullo Isroilov konsertning ikkinchi rejissyori Halima Ibragimova yo‘qligi haqida ham gapirib o‘tdi.

— Halimaning joyi jannatdan bo‘lsin, uni sahnaga birinchi bo‘lib o‘zim olib chiqqanman. O‘ziga yarasha bir olam qiz edi. Hech kim birovning o‘rnini bosolmaydi, albatta, o‘rni bilinyapti. Uning o‘ziga yarasha “baqir-chaqir”i bor edi, Yulduz Usmonova ham unga o‘rganib qolgandi, ona-bola bo‘lib ketishgandi. Yaqinlariga Alloh sabr bersin, deydi qiziqchi.

Konsert so‘ngida xonanda Malik bilan kuylangan “Yor biyo” hamda tojikcha qo‘shiqlar barchani oyoqqa turg‘azdi. Yosh-u qari birdek raqsga tushdi.

“Muhabbat” raqs maktabi ustozi, raqqosa Muhabbat Qurbonova shogirdlari bu yil ilk bor bunday katta masshtabdagi konsertda ishtirok etayotganidan faxrlanib, kuchli hayajondaligini ham aytdi.