Kulgi umrni uzaytiradi, u orqali charchoq va muammolar bir zumga bo‘lsa-da unutiladi. Yaxshi kayfiyat yuqumli bo‘ladi, bir inson sabab minglab odamlarning yuziga tabassum, qalbiga iliqlik yugurishi mumkin.
“Xalqlar do‘stligi” san’at saroyi mana necha kundir-ki yuqori energiya va “yangisini eshitish” maqsadida kelgan tomoshabinlar bilan to‘la. O‘zbekistondagi eng mashhur qiziqchilardan biri, so‘z ustasi Avaz Oxun 15—24-noyabrga qadar “To‘ydagi tomosha” nomli konsert dasturini o‘tkazib kelmoqda. “Daryo” jamoasi bu yil ham qiziqchining konsertidan qaynoq reportaj tayyorladi.
Avaz Oxundan eng birinchi so‘ralgan savol bu yilgi konsertda kim boshlovchilik qilishi haqida bo‘ldi. Qiziqchi bu mas’uliyatli vazifani suxandon Tolibjon Isroilovga ishonganini aytdi.
Qiziqchini qo‘llab-quvvatlash uchun uning hamkasblari, san’at vakillari kelib, u bilan konsertgacha bo‘lgan jarayonda yelkama-yelka turdi. Ijodkorning o‘n kunlik konsertning har bir seansida yonida bo‘ladigan ustozi oq fotiha berdi.
Navbatdagi dasturda qanday mavzular bo‘lishi haqida qiziqchi javob berdi:
— Bu yilgi konsertda maktablar mavzusi, ustozlarni ulug‘lash, hozirgi kunda ta’limga berilayotgan e’tibor haqidagi sahna ko‘rinishlari bor. Avvallari biz maktabda paxta terib, dalada yer chopib o‘qigan bo‘lsak, hozirgi o‘quvchilar va ustozlar majburiy mehnatga jalb qilinmaydi, bu odamni xursand qiladi, albatta. Oldingi ta’lim bilan hozirgisi, o‘qituvchi va o‘quvchilarga avvalgi munosabat bilan bugungisini taqqoslab, shuni yumor bilan yetkazib beramiz. Ayolni ulug‘lash, oilani muqaddas deb bilish, ota-ona munosabati, farzand tarbiyasi haqida hamda yevropacha o‘qisak-da, yashash tarzimiz sharqona bo‘lsin deya shu mavzularga qo‘l urdik. Tomoshabinlarga ham ma’qul bo‘lyapti — oila mavzusidagi deyarli barcha hazillar bor.
Konsertdagi yulduzli mehmon Ulug‘bek Rahmatullayev jonli ijrodagi qo‘shiqlari bilan muxlislarni xursand qilib kelayotgandi. Biroq xonandaning konserti ham Avaz Oxunnikidan bir hafta oldin bo‘lib o‘tgani, shu sabab tomog‘i og‘rigani tufayli tadbirga kelolmadi. Ammo yosh, iste’dodli xonanda Suhrob Hamdamov qadrdonini shoshilinch vaziyatda jonli ijrodagi qo‘shiqlari bilan “qutqardi”.
— Konsertimdan insonlar ta’sirlanib, qaysidir ishga motivatsiya olishini, biror vaziyatdan xulosa chiqarishini xohlayman. Bir kuni ayolim go‘zallik salonida boshqa ayollarning o‘zaro suhbatini eshitib qolibdi. Bir ayol eri bilan ajrimga ariza bermoqchi bo‘lib yurgan ekan, so‘ng konsertimda oila haqidagi fikrlarimni eshitib qolib xulosa chiqarishibdi, shu oila saqlanib qolibdi, deydi Avaz Oxun.
“Ijodkor o‘zidan ko‘ngli to‘lmasligi, qoniqmasligi, xotirjamlikka berilmasligi kerak. Qachonki o‘zidan ko‘ngli to‘lsa, o‘sha kuni ijoddan to‘xtaydi. Yulduzlik kasaliga chalinmay, bor maqtov va e’tirofni sokin qabul qilishi lozim”, deya qiziqchi o‘z fikrlari bilan bo‘lishdi.
Zavqqa to‘lish va bu yilgi konsert qanday o‘tayotganini ko‘rish uchun to‘liq videoni “Daryo”ning Lifestyle YouTube kanalida tomosha qiling.
Izoh (0)