O‘zbekiston va Qoraqalpog‘iston xalq artisti G‘ulomjon Yoqubov 1-mart kuni 75 yoshni qarshilaydi. U qo‘shiqchi nabirasi, 25 yildan buyon konsert berishi, qo‘shiq talashish ongsiz odamlarning ishi ekani va uni o‘ldi deya yolg‘on xabar tarqatganlar haqida “Daryo”ga intervyu berdi.
G‘ulomjon Yoqubov 50 yildan ortiq vaqtdan buyon san’atda. U 25 yildan buyon doim 1-2-mart kunlari konsert berib, tug‘ilgan kunini muxlislari davrasida nishonlaydi.
— Tug‘ilgan kunimda menga ko‘pchilik bilan u yer bu yerda o‘tirib bazm qilish ma’qul emas, uni o‘rniga sahnada kuylasam, xalq meni eshitsa, dardlarimni to‘kib sochsam, deyman. Kimdir restoranni ma’qul ko‘rar, lekin menga muxlislar bilan bo‘lish yoqadi. Endi bu yil tavallud kunim Ramazon oyining ilk kuniga to‘g‘ri kelayotgani sababli, bu oyning hurmatidan konsertni bir kun avvalga ko‘chirdik, ertasiga esa yaqinlar bilan iftorlik qilamiz, deydi ustoz xonanda.
G‘ulomjon Yoqubov farzandlari san’atkor bo‘lishiga tish-tirnog‘i bilan qarshi bo‘lgan. Ammo nabiralarga bu sohaga kirishga ruxsat berdi. Uning o‘g‘il nabirasi bir necha konsertlarda qo‘shiq kuylab chiqayotgan bo‘lsa-da, bu yigit san’atkorning nabirasi ekani haqida ommaga aytilmadi.
— Qo‘shiqchi nabiram haqida hech qayerda gapirmasligimning sababi ko‘z tegmasin deyman. U hali go‘dak, ovozi o‘zgarishi bor. Yoshligidan tanilgan qanchadan qancha mashhur xonandalar bor, ovozi bilan dunyoni hayratga solgan. Ammo birozdan so‘ng ovozi o‘zgarib ketgan. Hali yosh bolaning ovozi rasta bo‘ladi, shu jarayondan o‘tib olgani — hisob. Bu yilgi konsertda chiqish qilmaydi, ovozi o‘zgaryapti. Bunday vaqtda ovozni asrab turish kerak, deydi G‘ulomjon Yoqubov.
Xalq artisti o‘zining qo‘shiqlarini boshqa xonandalar kuylashiga qanday qaraydi?
— Yorqinxo‘jaga ruxsat berdim, “Dilorom”ni kuyladi. Kaverda ham o‘zim o‘tirgandim, menga yoqdi, bo‘ldi, kuylayver, dedim. Qayerga borsak ham birgalikda aytib beringlar, deyishadi. U qanday aytgan bo‘lsa, men ham unga qo‘shilib kaver qilib aytib beraman. Bunga hech qarshiligim yo‘q, faqat qo‘shiqni buzib tashlamasa bas. Hech kim kuylamasin, deyish noto‘g‘ri, dedi san’atkor.
Hozir avj olayotgan qo‘shiq talashish, ustoz san’atkorlarning qo‘shig‘i kuylansa, taqiq qo‘yish kabilarga G‘ulomjon Yoqubov nima deydi?
— San’at — xalqniki. Xalqning ichidan chiqdimi, unga berish kerak. Qo‘shiq qayta kuylansa, ko‘proq yashaydi, hech kim aytmagandan keyin bora-bora yo‘q bo‘lib ketadi. Bu qo‘shiqni sen kuylama deyish ongsiz odamlarning fikri, ongsiz odamlarning da’vati. O‘sha gapni gapirganlar — eng ongsizlar! Ularni faqat ongsiz deb o‘ylayman. Ular fahm-farosati yo‘q odamlar! Bemalol aytaverish kerak, faqat qo‘shiq buzilmasa bo‘lgani. Men hammaga qo‘shiqlarimni aytishga ruxsat beraman, ma’qul kelgan bo‘lsa, bemalol, dedi xalq artisti.
Odamlarning san’atga munosabati bugun qanchalik o‘zgargan? Bugungi shou-biznesning ahvoli haqida san’atkor quyidagicha fikrda
— Bizga maqom maktab paytidan o‘rgatilgan. Hozirgilar shov-shuvni orqasidan ergashadi. Bu o‘zbek san’ati emas, shou-biznes, pul topish yo‘li. Qo‘shiqda o‘zbek ohangi, nolasi va dardi, avji bo‘lishi kerak. Bugungi qo‘shiqlarda dard yo‘q, nola yo‘q. Bitta gapni qaytaveradi, “ura-ura” qilib bir narsani aylantiraveradi. O‘tirgandayam, yotgandayam shu qo‘shiq, klipi ham aylanaveradi. Yosh bolaning qulog‘i xohlasa, xohlamasa shuni eshitadi. Menga necha marta hakam bo‘ling deyishadi. Bormayman, chunki undaylarni eshitib g‘ashim keladi. Qaysi birini maqtay olaman keyin? Ovozi mustahkam yigit-qizlar bor, o‘shalarni qo‘llab-quvvatlash kerak. “Shaldir-valdir”lar nimaga kerak? Men 20-30 yildan beri qarab yuribman — besh yil chiqadi yo‘q bo‘ladi, uch yil chiqadi yo‘q bo‘ladi. Lov etib yonib, puf etib o‘chadi. O‘zbekning san’ati tamoman boshqacha! Ba’zi qo‘shiqlarga quloqni yopib olish kerak, umuman eshitib bo‘lmaydi. Lekin aynan shularga o‘rtaga tushib olib o‘ynashadi, yoshlarni buzyapti bular. To‘y deb faqat bir xil narsa qilish kerakmas, deydi xalq artisti.
Bir necha oy ilgari G‘ulomjon Yoqubov haqida tarqalgan yolg‘on noxush xabar ko‘pchilik singari san’atkorning o‘ziga ham qattiq botdi...
— Hayotda har xil odam bor, ajrata olmaysiz. Tirik odamni o‘ldi deyish nimaga to‘g‘ri keladi? Men birovni bekordan bekorga o‘ldi deb gap tarqatsam, menga Xudo ko‘rsatadi. Bu bir misol. Avval tekshirish kerak, rost bo‘lsa keyin aytish kerak. Orqadan valdir-vuldir gap nega kerak? Bu noxush xabar qalbimga og‘ir botdi. Tushunsa tushunmasa, yana shunday xabar tarqatishyapti. Yaxshi otga bir qamchi, yomon otga ming qamchi. Ularga gapirishning foydasi yo‘q ekan, insof bersin. Meni “o‘ldi”ga chiqarishsa ham, ijodimni qilib kelyapman. Shunday deganlarga ham umr tilayman. Ijodimni to‘xtatmoqchimasman, umrimning so‘nggigacha xalqqa xizmat qilaman, deydi G‘ulomjon Yoqubov.
San’atkor haqida gap ketar ekan, uning garderobi alohida mavzuga aylanadi. G‘ulomjon Yoqubov kostyumlari haqida barcha uchun qiziq savollarga javob berdi:
— Men chet elga borsam, faqat do‘kon qidiraman. O‘zimizdagi do‘konlarga kirmasligim mumkin, lekin chetdan, albatta, o‘zimga mos narsa topib chiqaman. Bir yilda 3-4 marta boraman, Yaqinda ham garderobimni ko‘rsatishimni so‘rashdi. Yo‘q, ko‘rsatmayman, nima qilaman ko‘rsatib? Odamlar uyi bilan, mashinasi bilan maqtanadi, menga yoqmaydi bunday qilish, shuning uchun garderobimni ham ko‘rsatmayman. Kiyganimda ko‘rishsin, yoqsa, qabul qilishsin. Shuning o‘zi yetadi. Eng qimmat kostyumim narxini ham aytmayman. Qurbi yetadigan odam bor, yetmaydigani bor. Birovning g‘ashiga tegib nima foyda topaman? 30-40 yil avval kiyganlarim ham turibdi, mendan keyin muzey qilishadi (kulib), deydi ijodkor.
Suhbatni Daryo Lifestyle YouTube sahifasida to‘liq tomosha qiling.
Izoh (0)