“Qashqadaryo”, “Qoraqalpog‘im” hamda hitmeyker Hamdam Sobirov bilan kuylagan “Kara go‘zim” taronalari bilan mashhurlikka erishgan xonanda Sevinch Ismoilova 28-yanvar kuni “Xalqlar do‘stligi” san’at saroyida bir kunlik konsert dasturini muxlislari e’tiboriga havola etdi. Yosh qo‘shiqchi Sevinch Ismoilovaning konsertida “Daryo” muxbiri qatnashib, xonanda, uning yaqinlari va duetdoshlari bilan suhbatlashdi.
Xonandaning muxlisi qanchalik ko‘pligini to‘rt mingdan ziyod tomoshabinni sig‘diradigan konsert zalida birorta bo‘sh o‘rindiq yo‘qligidan bilib olish qiyin bo‘lmadi.
Bir necha yildan beri konsert beradigan xonandalar ham dastur boshlanishidan avval qattiq hayajonlanishiga qaramay, endigina ikkinchi yakkaxon konsertini berayotgan Sevinch yaqinlari va do‘stlari bilan o‘zini erkin his qildi. Fursatdan foydalanib uni suhbatga chorladik.
— Bu safar ichimda ozgina tinchlik bor rosti, o‘tgan yili rosa hayajonda edim. Shuni tushundimki, hayajonni yengib, xotirjam bo‘lsam, konsert ham yaxshi, tinch o‘tadi. Oldimdagi odamlarga ham bosib bo‘lmaydi. O‘tgan yili ularning barchasiga hayajondan bosim o‘tkazib qo‘ygandim. Shuning uchun bu safar jim turibman, deydi kulib Sevinch.
— Bu yil sahnada, repertuar va ssenariyda yangiliklar talaygina. Konsertimda o‘zimga ham syurprizlar ko‘p bo‘ldi. Yangi klipimni sahnada katta ekranda premyera qilamiz. O‘tgan yili ham yangi qo‘shiq va klipni muxlislarimga taqdim etgandim — bu bizga har yillik an’ana bo‘lib boryapti. Kelgusi yillar ham bu an’anani chiroyli davom ettirish niyatidamiz, dedi u.
Konsertga mehmon sifatida Vohidjon Isoqov, Osman Navruzov, klipmeyker Ikrom Ali va ko‘plab xonandalar tashrif buyurdi. Hamdam Sobirov, Alisher Bayniyazov bilan kuylangan duetlar esa zalni raqs tushishga majbur qildi.
— Bugun konsertga mehmon sifatida keldim, duet bo‘lmayotganining sababi mening konsertimda ham duet ko‘p bo‘ldi. Agar menikida aytsak unikida ham aytishimizga to‘g‘ri kelib, takrorlanish bo‘lib qolardi. Ikkimizning konsertimiz orasi yaqin bo‘lgani sababli bir narsaga qarab qolishni xohlamadik, nasib etsa konsertdan so‘ng yangi taronamizni taqdim etamiz.
Avvalo Allohdan berilgan kuch va omad tufayli, bundan tashqari o‘zi ham Sevinch tinmasdan mehnat qilyapti, xalqning qo‘llab-quvvatlashi bilan birga shunday dargohda konsert berish darajasiga yetib keldi. Sevinchga kelgusida 10-15 kunlab konsert berishini tilayman, deydi Osman Navruzov.
Hamdam Sobirov bilan kuylangan “Kara go‘zim” qo‘shig‘i YouTube’da 74 million marta ko‘rilgan. Bu tarona har ikki xonanda uchun ham, shubhasiz, yorqin kollaboratsiya bo‘ldi. Hamdam Sobirov Sevinchni konsert bilan tabriklab, sahnada unga qip-qizil atirgullar sovg‘a qildi.
— Konsert ajoyib atmosferada o‘tmoqda. Boshqa san’atkorlarga qaraganda Sevinch o‘zining tarbiyasi, ijoddagi o‘zgacha yo‘nalishi bilan ajralib turadi. Gaplashsa ham samimiy gaplashadi, yuragi toza. O‘ziga ham kelasi yillarda 10 kunlab konsert berish nasib qilsin, deb aytdim. Sevinchning konsertida yangi duet kuylashga ulgurmay qoldik, Xudo xohlasa 24-mayda o‘zimning konsertimda u bilan duet bo‘ladi, albatta, deydi u.
Konsertda “kichkina tabib” Dilshodbek Kattabekov, qiziqchi Nodir “lo‘li”, shoumen Ahror Qo‘shmatov boshlovchilik qilib, har bir blok orasida tomoshabinlarga xush kayfiyat ulashib turdi.
Sevinch bilan bir necha kun xonanda Osman Navruzovning konsert dasturida suhbatlashilganda, “Bu yilgi konsertim bir kun bo‘ladi, kelasi yil 2-3 kun qilmoqchiman” deganini eslab, bir kun muxlislar uchun kamlik qilishini aytib, rejalar o‘zgargani haqida so‘radik:
— Bir necha kundan buyon aynan shu haqida gaplashyapmiz, nasib qilsa, kelasi yil 2-3 kun konsert bermoqchiman. Ustoz san’atkorlar bilan ham duet kuylash fikri bor, ammo o‘zimning bobom ham katta san’atkor, xonanda edilar. Ustoz san’atkorlarning ko‘pi rahmatli bobomni yaxshi taniydi. Konsertimda bobomni ko‘rish menga armon bo‘lib qoldi.
Sevinch Ismoilovadan muxlislar, asosan, sevgi-muhabbat haqidagi va sho‘x taronalar eshitib o‘rgangan. Ammo xonanda yuki bor, og‘irroq mavzularda ham kuylaydimi? Bu savolga Sevinchning o‘zi shunday javob berdi:
— “Omad” nomli qo‘shig‘imni bugun premyera qilamiz, shu va shunga yaqin voqealar 99 foiz insonning boshida o‘tgan, deyolaman. O‘zimning ham hayotimda bunday voqealar ko‘p bo‘lgan. Klip tayyor bo‘lgach, yaqinlarimga ko‘rsatganimda ko‘pchilik ko‘ziga yosh olib, hayotim esimga tushdi, dedi.
Konsertdan reportajni to‘liq holda Daryo Lifestyle YouTube kanalida tomosha qiling.
Izoh (0)