“Muhabbat bahori” filmidagi Zulfiyaxonim roli bilan tomoshabinlarga yaxshi tanish bo‘lgan aktrisa Shahnoza Hojimurodova YouTube’dagi Daryo Lifestyle kanaliga bergan intervyusida hayot sinovlari uni aktrisa bo‘lishga undagani haqida gapirdi.
— Hayotimda bir-ikkita ko‘ngilsizliklar bo‘lib, ruhiy tushkunlikka tushib qolgandim. Qo‘limda bitta farzandim bilan ota-onamning uyida yashayotganimda onam “Sen o‘qishing va hayotda o‘z o‘rningni topishing kerak”, deb ko‘p aytardi. 2013-yilda Ozodbek Nazarbekovning “Sarson” nomli qo‘shig‘i va unga ishlangan klip mashhurlikka erishgandi. Rayhon Ulasenovaning ijrosiga havasim kelib, “Onajon, qaniydi men ham shunday rollar ijro etsam” degan edim. Ota-onam har bir qarorimni qo‘llab-quvvatlashgach, eng qiyin vaziyatimda hech qachon yolg‘izlatishmagan. Buning uchun ulardan hamisha minnatdorman. Dadamning o‘zi meni Toshkentga yetaklab kelgan, ijara uyda yashab, institutda tayyorlanganman. Shartnoma asosida o‘qishga kirsam, nima qilaman, ota-onamga og‘irligim tushadimi, deb ikkilanganman. To‘g‘ri, o‘ziga to‘q oilaning farzandiman, ammo qiz bola turmushga chiqqanidan keyin baribir yaqinlaridan istihola qilarkan. Omadim kelib, grant asosida o‘qishga qabul qilindim. O‘g‘lim onam bilan birga qoldi, men hali oila qurmagan, hech qanday tashvishi yo‘q qizlardek emin-erkin o‘qiganman. Hamma narsani bilaman deb maqtanmayman, ammo ustozlarim harakat uchun ham besh baho qo‘yib berishardi, deydi aktrisa Shahnoza Hojimurodova.
Shahnoza Hojimurodova avvaliga teatrga qabul qilishmagani va munosib aktrisa ekanligini qanday isbotlagani haqida gapirdi.
— Ustozlarimiz o‘qish vaqti syomkalarga borishimizga ruxsat berishmasdi. Avval poydevorni mustahkam qilish kerakligini aytishardi. O‘qishni tamomlab, O‘zbek Milliy akademik drama teatriga bordik. Ammo rahmatli Fathulla Mas’udov shtat o‘rni yo‘qligini aytdi. Hafsalam pir bo‘lib “Endi Xorazmga qaytib ketamanmi?” deb o‘yladim. Chunki bu teatrda ishlashimni nafaqat men, balki onam ham istardi. Uch marta rad javobini olgach, umidim ham so‘nib qolgandi. O‘sha paytlarda “Madaniyat va maʼrifat” kanalida “Obraz shou” degan ko‘rsatuv bo‘lardi. Ko‘rsatuvning yangi sonida “Zaynab monologi” ijro etilishini aytib, rolga taklif etishdi. Ishtirokchilarning hammasi professional, teatrning tajribali aktrisalari edi. Ularning orasida yolg‘iz men institutni endi tugatgan edim. Xullas, ishtirok etdim, rahmatli Shuhrat Qayumov, aktrisa Lola Eltoyeva chiqishimni yuqori baholashdi. Ana shu ko‘rsatuvdagi ishtirokim O‘zbek Milliy akademik drama teatriga ishga qabul qilinishimga sababchi bo‘ldi. Chunki uni Fathulla Masʼudov ham tomosha qilgan ekan. Ammo bu hali shtatga qabul qilindim, degani emasdi. 4 yil davomida gonorar asosida ishlab, taniqli rejissyor Bahodir Yo‘ldoshevning chig‘iriqlaridan o‘tib, keyin shtatga qabul qilindim, deydi Shahnoza Hojimurodova.
Aktrisa Zulfiyaxonim roliga tasodifan tasdiqlangani va o‘shanda kamera qarshisida turishni o‘rgangani haqida gapirdi.
— Aktrisa bo‘lish uchun zaring yoki zo‘ring bo‘lishi kerak, deyishadi. Baʼzi aktrisalar esa intervyularida rejissyorlar nomaʼqul taklifni berishgani, u rad etgani uchun rolga tasdiqlashmagani haqida aytishadi. 2019-yildan buyon ijod qilayotgan bo‘lsam, na kino, na teatrda bunday holatga guvoh bo‘ldim. Mehnatkash, iqtidorli va tabiiy yuzli aktrisa hamisha kerak. Agar o‘sha rol aktrisaniki bo‘lsa, hech kim uni cheklolmaydi. “Muhabbat bahori” filmiga kasting bo‘layotganini dugonamdan eshitganman. Hamma qatori fotokasting topshirganman, hammaga bir xil monolog berilgan. Undan keyin videokastingga chaqirishgan. Mendan avval eng mahoratli, taniqli aktrisalar kasting topshirishgandi. Ular shoshib turgani uchun “Hamma topshiraversin, mening vaqtim bemalol”, degandim. Videokasting Zulfiyaxonim va Hamid Olimjon yashagan uyda bo‘lib o‘tgandi. Bir chekkada xayolan Zulfiyaxonim bilan gaplashib tursam, kelinlari meni ko‘rib “Shu qizda ayajonimni ko‘rgandek bo‘ldim”, degan ekan. Zulfiyaxonim roli ijodimdagi ilk va bosh rol bo‘lgan. U sabab kamera qarshisida turishni o‘rganganman, deydi aktrisa.
Videoni to‘liq holda tomosha qiling.
Izoh (0)