Marhum san’atkor Sherali Jo‘rayevning shogirdi, xushovoz xonanda Ahror Usmonov san’atkorlar aslida qanday bo‘lishi kerakligi, nega hozirgi ayrim “yulduzlar” sabab barcha birdek “qora” bo‘lib qolayotgani haqida “Daryo”ga intervyu berdi.
“San’atkor bo‘lmaganimda siyosatshunos bo‘lardim”
— Yoshligimda uyimiz devorida dunyoning siyosiy xaritasi ilinib turardi. Qiziqishim kuchli bo‘lgandan, deyarli barcha davlatlarning joylashuvi, nomi va bayrog‘i ko‘rinishini eslab qolardim. Otam savdogar bo‘lgan, juda talabchan edi, ammo san’atni juda sevardi. Toshkentlik san’atkorlar biz taraflarga kelsa uyimizda mehmon bo‘lmay ketmasdi. U bilan xaritadagi davlatlarning nomini yoddan aytib “bellashardik”. San’atga ham juda yoshligimdan kirib borganman, maktabdagi tadbirlarda qo‘shiq kuylardim. Agar san’atkor bo‘lmaganimda siyosatchi bo‘lardim, lekin san’at, ijoq qilish baribir ustun kelgan, deydi qo‘shiqchi.
“Shunday kunga kelib qoldikmi, deya ko‘p ranjiyman”
— Yoshlarga ham maslahat, ham taklifim: telefonni bir chetga qo‘yib, kitob o‘qishsin, dunyoqarashini kengaytirsin. Teleko‘rsatuvlarda salohiyatli yoshlarni ko‘rib havas qilaman. O‘zimni ko‘p narsani biladigan inson deb hisoblardim, ammo o‘sha yoshlarni ko‘rib, qiyin savollarga ham javob berayotganini ko‘rib o‘zimni naqadar kam narsa bilishimni angladim. Lekin bunday yoshlar faqat televideniyeda emas, yon-atrofimizda, hayotimizda bo‘lishi kerak. Ba’zilar hatto ismining ma’nosini bilmaydi, “-ni” va “-ning” qo‘shimchasining farqini ajratolmaydi. OAVlarda ham jumlalar, qo‘shimchalar xato yozilganini ko‘rib juda ranjiyman va shunchalikka kelib qoldikmi, deb o‘ylanib qolaman. Umid qilamanki, oliy o‘quv yurtlarida talabalarga bu borada yanada chuqurroq ta’lim beriladi.
San’at insonga Alloh tarafidan yuqtiriladi. Ota-onalar farzandim Sherali Jo‘rayev, Mutal Burxonov, Muhriddin Xoliqov, Ozodbek Nazarbekovga o‘xshagan qo‘shiqchi bo‘lsin deya olib keladi, ammo “slux”, ovoz bo‘lmasa undan san’atkor chiqishi qiyin. Qo‘shiqchilikka talanti bo‘lmasa bolani majburlash kerak emas, unda balki boshqa tomondan qobiliyat bordir, balki shifokor bo‘lar, balki bokschi. Ota-ona farzandining imkoniyatlarini ko‘ra bilib, uni baholay olishi kerak, dedi san’atkor.
“Komiljon Otaniyozov oddiy yigitdan uzr so‘rab, to‘yini o‘tkazib bergan”
— Avvallari odamlar san’atkorlarga juda hurmat bilan qaragan, ularga havas qilib, Sherali, Komiljon, Mutal (Mutavakkil), Nuriddin deya ismlar ham qo‘ygan. Hozir esa ba’zilar tanilish, qandaydir nom chiqarish uchun san’atkor degan nomni bulg‘ayapti. Ming afsuski, ularning ichida bizning ham san’atkor degan nomimiz bor. Xalqning mehrini qozona olishimiz kerak, ustoz san’atkorlar nafaqat xalqning to‘ylarida, balki motam yoki oddiy hashar vaqtlarida ham xalqning o‘g‘loni bo‘lib ular bilan yonma-yon turgan. Komiljon Otaniyozovning “GAZ” avtomobili bo‘lgan, o‘sha mashinada ketayotib bir yigitga bexosdan suv sachratib yuborgan. Tushib darhol yigitdan uzr so‘rab, aybini qanday yuvishi haqida o‘ylagan va uylanganmisan deb so‘ragan. Yigit hali uylanmaganini aytgach, uylanadigan kuning to‘yga meni chaqir, men o‘sha siz suv sachratgan yigitman desang eslayman, to‘yingda, albatta, xizmat qilib beraman degan. Oradan bir necha yil o‘tib yigitning to‘yi belgilanganda, Komiljon Otaniyozovni topib borgan va o‘zini eslatgan. Bo‘ldi, va’da-va’da, deya Komiljon aka to‘yni chiroyli o‘tkazib berib, o‘ziga “qistirilgan” pullarni ham hammasini yig‘ib, yigitga berganlar va meni kechirdingmi deganlar. Men o‘ylashimcha, san’atkorlar shunday ko‘ngliochiq bo‘lishi kerak, deydi Ahror Usmonov.
Suhbatni to‘liq holatda Daryo Lifestyle YouTube kanalida tomosha qilishingiz mumkin.
Izoh (0)