O‘zbekistonda xizmat ko‘rsatgan artist, “Oh, mani Vatanim bu” qo‘shig‘i bilan sevimli bo‘lgan xonanda Abdurashid Yo‘ldoshev “Daryo”ga intervyu berdi. Intervyu davomida oilasini nega ommaga ko‘rsatmasligi, el sevgan qo‘shig‘ining yaratilish jarayoni va marhum san’atkor Musaxon Nurmatov haqida gapirdi.
“Kamerani uyimga olib kirmayman”
— Ota-onam tug‘ilmasimdanoq san’atkor bo‘lishimni xohlashgan. Otam boshqa soha vakili bo‘lsa ham, ikkinchi mutaxassisligi xonanda, ismlari Abduvahob Yo‘ldoshev. San’atkor bo‘lishimni mendan-da ko‘p istagan inson otam bo‘ladi. Uyimda intervyu bermasligimning sababi ham otam “Oila alohida bo‘lishi kerak, uni ko‘rsatmagan ma’qul. Muxlislar ijodingga qiziqsin, oilani san’atga aralashtirish kerakmas” deydi. Ustozlar ham shunday qilgan-ku, ulardan ham o‘rnak olganmiz. Kamerani shuning uchun uyga olib kirmayman (kulib). O‘zimning to‘rt qiz, bir o‘g‘lim bor, yaqinda yana bir bor nabirali bo‘ldim, beshinchi nabiram dunyoga keldi. Barchaga shunday xursandchiliklar nasib etsin, deydi xonanda.
Hit qo‘shiqning o‘zgacha yaratilish tarixi
— Yaxshi qo‘shiq yaratish oldindan bilib bo‘lmaydigan narsa. Xudo ol qulim, desa ajab emas, ammo hadeb yaxshi qo‘shiq chiqavermas ekan. “Oh, mani Vatanim bu” qo‘shig‘ining yaratilish tarixi ham ajoyib bo‘lgan. Bilasiz, sport sharhlovchisi Xayrulla Hamidov shoir hamdir. Xayrulla akaga shunday she’r yozib beringki, so‘zlari samimiy bo‘lsin, ona Vatanimiz haqida go‘zal she’r bo‘lsin, deganman. Shu haqda telefonda gaplashayotganimizda birdan aloqa uzilib qolgan, sababi Xayrulla aka bu vaqtda Qamchiq dovonida yo‘lda bo‘lgan. Bilsangiz, avval o‘sha yerda aloqa uzilardi. Shu bilan aloqa tiklanguncha oradan kamida 2-3 soat vaqt o‘tgan, she’r esa tayyor bo‘lgan. Ishonasizmi, tabiatdan, ona yurtimizning go‘zalligidan ilhomlanib darhol she’r ham yozilgan. Endi she’rga kuy bastalatish vaqti kelganda, u ham hayratlanarli darajada tez bo‘lgan. Odatda o‘sha vaqtlar kuy ham tez deganda bir oyda tayyor bo‘lardi. Lekin bir bastakor akam ikki kunda tayyorlab bergan va qachon yozamiz, hammasi tayyor deb qo‘ng‘iroq qilgan. U paytda Ozodbek Nazarbekovning “Ozod shou” dasturi bo‘lardi, Konstitutsiya kuniga bag‘ishlangan soniga to‘g‘ri kelib qolgan, qo‘shiq to‘liq tayyor bo‘lmasa-da, xomaki variantini ijro qilib, so‘ng oxiriga yetkazib qo‘yganmiz, deya esladi Abdurashid Yo‘ldoshev.
Yoshligimda ko‘p sohalarda o‘zimni sinab ko‘rganman. Zargarlik ham, qassoblik ham, issiqxonada dehqonchilik ham qilganman. Issiqxonadagi ishlarni oilaviy o‘zimiz yoqtirib qilardik, deydi xonanda.
“Musaxon Nurmatov bilan 20 yillik ijodiy hamkor bo‘lganmiz”
— Musaxon aka bilan 2004-yilning oxirlarida tanishib, 20 yil birga ijod qildik. Noyob inson edi, ko‘p narsani u kishi bilan maslahatlashardim, tanqidning zo‘rini ham o‘zlari qilardilar. Noto‘g‘ri qilinayotgan harakatning hech biri e’tiboridan chetda qolmasdi, shu ishni qilmang, ota, deb qo‘yardi. Juda ko‘p kitob o‘qirdi, oilasi ham o‘qimishli, ziyoli oila edi. Bir kuni uyimga kelib qoldi, ta’mirlash ishlarini boshlagandik. Uyning mana bu joyini bunday qilaman, bu joyini shunday qilaman deb gapirib tursam, “Otam, qilaman, qilaman, deb gapirmang. Alloh Qur’oni Karimda biz, deb murojaat qiladi. Men deb gapirish juda xunuk. Bu qurilishning ortida nechta odamning xizmati bor-ku, avvalo, ota-onaning, keyin quruvchi-yu ustalarning. Men deb gapirish mumkin emas”, deya tanbehlar ham berib ketardi. O‘sha voqeagacha men bu narsa e’tibor bermas ekanman, bu atigi bir donasi, deydi san’atkor.
Intervyuni to‘liq holda “Daryo” Lifestyle YouTube kanalida tomosha qiling.
Izoh (0)