Bir yilda ikki marta konsert beradigan “Benom” guruhi noyabr oyidagi konsertiga start berdi. Xonandalar Sarvar va Komil jonli ijroda eng hit taronalarini kuylab, zalga yig‘ilgan to‘rt mingdan ziyod muxlislarining quvonchiga sabab bo‘ldi. “Daryo” jamoasi jonli ijrodagi konsert dasturida ishtirok etib, haqiqiy atmosferani his qilishga imkon yaratadigan reportaj tayyorladi.
“Dardim tingla, osmon” nomli kino-konsert odatdagidek qisqa metrajli film bilan boshlandi, ko‘plab kliplarda qatnashayotgan aktrisa Kristina Rustamova bosh qahramon rolida gavdalandi.
“Konsert kutganimdan-da yaxshi o‘tdi, sababi filmni suratga olish ishlari bilan band bo‘lib tayyorgarlik jarayonlarida deyarli qatnasholmagandik. Shaxsiy hayotimizda ham biroz qiyinchilik bo‘ldi, konsert qanday o‘tarkan, xatolar bo‘lsa kerak, deyotgandim. Yo‘q, hammasi zo‘r o‘tdi. Kuz oyida kino-konsert, may oyida odatiy konsert berishimizga barcha o‘rgangan. Ko‘pchilik muxlislarning kino-konsertdagi filmda nega o‘zingiz rol o‘ynamaysiz, axir biz sizlarni ko‘rish uchun kelamiz, degan taklifini inobatga olib bu safar o‘zimiz rol ijro etishga qaror qildik. Filmda men salbiy qahramon rolida chiqib, so‘ngida yaxshi tarafga o‘zgarganman”, deydi Sarvar.
Kino-konsert g‘oyasi ilk bor “Benom” guruhidan chiqqan va undan so‘ng ko‘plab san’atkorlar ham shu formatdagi konsertni taqdim etdi. G‘oya eskirmadimi, yangilik qilish niyatingiz yo‘qmi, degan savolga Sarvar shunday javob berdi:
Yangilik qilish niyatimiz bor, albatta, fevral oyida “Humo arena”da konsert qo‘yish borasida muzokaralarni olib bormoqdamiz. To‘rt kunlik konsertimizning chiptalari bir oy oldindan sotilib bo‘lgandi, yana ikki kun qo‘shmoqchi edik, ammo “Xalqlar do‘stligi”dagi kunlar taqchilligi sabab buning imkoni bo‘lmadi.
Kunduzgi seans qo‘shish rejasi ham bo‘ldi-yu, ammo sozandalar jonli chalgani, o‘zimiz ham jonli kuylaganimiz sababli ikki seansda ovoz paychalari qiynalib qolishi mumkin edi. Fonogramma bo‘lganda, bemalol bir kunda ikki seansda konsert beravergan bo‘lardik.
Konsert so‘ngida yigitlar muxlislari so‘ragan taronalarni ijro etib berdi. “Benom”ning muxlislari haqiqatan boshqacha — buni xonandalarga turli sovg‘alar, shirinliklar, Sarvar va Komilning suratidan yasalgan gullar sovg‘a qilinganidan ham bilish qiyin emas.
Konsertingiz bir yilda ikki marta, balki ustoz san’atkorlar kabi yilda bir marta 10-12 kunlab konsert berish vaqti kelgandir, degan taklifga Sarvar shunday javob berdi:
Jonli ijroda uzoq vaqt konsert berish biroz qiyinroq, biz fonogramma aytmaymiz, fonogramma aytsak muxlislar konsertga tushishmaydi, ular bizning jonli ijromizga o‘rgangan.
Yuqori energiya bilan o‘tgan konsertda muxlislar “Benom” bilan baravariga barcha qo‘shiqlarni kuyladi, “Xalqlar do‘stligi”da haqiqiy shou bo‘lib o‘tdi.
Konsertning to‘liq reportajini “Daryo” Lifestyle YouTube kanalida tomosha qiling.
Izoh (0)