Afsonaviy “Setora” guruhi 20 yillik ijodiy tanaffusdan so‘ng yana “Xalqlar do‘stligi” saroyi sahnasida to‘liq tarkibda konsert dasturini sog‘ingan muxlislari uchun taqdim etib kelyapti. Dekabrning ilk uch kunida bo‘lishi rejalashtirilgan konsert besh seansda o‘tmoqda — kunduzgi va kechki seans. “Setora”ni sog‘ingan muxlislar armiyasi uchun aslida besh seanslik konsert ham kam. “Daryo” muxbiri shov-shuvli konsertda ishtirok etdi, unutilmas lahzalarni kameraga muhrlab, xonandalarning o‘ziga mikrofon tutdi.
Avvalo e’tiborimizni tortgani, konsertga tashrif buyurgan muxlislarning deyarli barchasi o‘rta yosh va katta avlod vakillari.
Konsert “Setora”ning “Ajdodlar” qo‘shig‘i fonida jonli tarixiy jang sahnasi ko‘rinishi bilan boshlandi. Keyingi chiqishda aktyorlar Tesha Mo‘minov, Muqaddas Xoliqova “Bibixonim” qo‘shig‘i sadosida yorqin sahna ko‘rinishida rol o‘ynadi.
Konsert yulduzli daqiqalarga boy o‘tdi. Aktrisa Asal Shodiyeva “Alla” qo‘shig‘ida qo‘lida chaqaloq bilan sahnaga chiqib, beshik tebratdi.
Bloger, qo‘shiqchi, teleboshlovchi Husnora Shodiyeva “kelin yangalar” Feruza va Laylo hamrohligida “Yor-yor” qo‘shig‘i sadolari bilan zal o‘rtasidan chiqib keldi va tomoshabinlardan kelin salomini ayamadi.
“Million” jamoasi a’zosi Ma’ruf Nosirov va Husnoraning yosh kelin-kuyov rolidagi “shirin tortishuvi” zalda yig‘ilganlarning to‘xtovsiz qarsagiga sabab bo‘ldi.
“Sahar” va “Setora” uzoq muddatga ijoddan uzoqda bo‘lgan bo‘lsa-da, o‘z muxlislariga ega guruhlardan. “Sahar” solisti Anvar Jo‘rayev bilan duet kuylandi va u “Setora” qizlarini hurmat qilishini, ularning samimiyligini qadrlashini aytib, ijodiy ishlariga omad tiladi.
Jami uch blokdan iborat konsert atmosferasini so‘z bilan tasvirlash biroz qiyin — sahna dekoratsiyalari, chiroqlar, raqqoslarning noodatiy raqslari va yorqin obrazlar, eng asosiysi, energiyaga boy, sevimli guruhi bilan jo‘rovoz bo‘lib kuylayotgan ashaddiy muxlislar. Bularning bari tadbirga o‘zgacha nafas bag‘ishladi. Qo‘shiqlarning barchasi yangi talqinda ijro etildi.
“Yilning eng shov-shuvli konserti” nominatsiyasi mukofoti iste’dodli Lolaga taqdim etilgandi. Albatta, oktyabr oyigacha bo‘lgan konsertlar ichida Lola Yuldashevaniki eng noodatiy va yorqin lahzalarga boy o‘tdi. Biroq afsonaviy guruhning konserti bu mukofotga ko‘proq munosib ekanini guruh qizlari ilk chiqishning o‘zidayoq isbotlab qo‘ydi.
“Konsertdagi hissiyotlar o‘zgacha bo‘ldi — sahnaga ilk bor chiqqandek hayajonlandik, ammo keyingi chiqishlarimizda barchasi o‘tib ketdi”, deydi Feruza Latipova.
“Muxlislarga yoqishi uchun konsertning uch blokida uch xil, bir-biriga o‘xshamagan obrazlarda namoyon bo‘lishni xohlagandik va eng zo‘r dizaynerlar yordamida buni uddaladik. Birinchi obraz — tarixiy, ikkinchisi — milliy, uchinchisi — disko, ya’ni yorqin uslub”, dedi Laylo Galiyeva.
“ Konsert mo‘jizaviy o‘tdi — kelgan barcha muxlislarimizga rahmat, — dedi Komila Xo‘jayeva. Yana konsert qo‘yish borasida hali bir nima deyishga erta. Aniq bo‘lmay turib yana konsert qo‘yamiz deb alday olmaymiz, bundan qilish mumkin emas. Avval yaxshilab tayyorgarlik ko‘rib so‘ng e’lon qilamiz. Bu so‘nggi konsert ekan degan gap so‘zlarga e’tibor bermang, bu noto‘g‘ri. Biz haqimizda juda ko‘p gaplar gapirilgan (kulib). Asosiysi biz buni uddaladik!”
Emotsiyaga boy o‘tgan konsertni quyidagi havola orqali to‘liq holda Daryo Lifestyle YouTube kanalida tomosha qiling.
Komila Qalandarova tayyorladi.
Izoh (0)