Noodatiy va ekstremal sahna ko‘rinishlari bilan ajralib turuvchi kulgi jamoasi, guruh sardori ta’biri bilan aytganda millionerlar guruhi — “Million” jamoasi 1—10-aprel kunlari navbatdagi konsert dasturini o‘tkazib kelmoqda.
Jamoa yigitlari avvalgi konsertlardan farqli ravishda, butkul yangi darajadagi dasturni va’da qildi. Xo‘sh, “Million”ning navbatdagi konsertida qanday yangiliklar bor? “Daryo” jamoasi konsertdan maxsus reportaj tayyorladi.
“O‘zbekning Jim Kerrisi” deya ta’riflanuvchi komik aktyor Mo‘min Ibrohimov to‘y sahnasida oshiq yigit rolini o‘ynab, 8 metr balandlikka ko‘tarilib, o‘zini sahnaga tashladi. Konsertning kelgusi kunlari esa 12 metrdan sakrashi haqida ham gap-so‘zlar bo‘ldi. Aktyor bunday katta tavakkalga qo‘l uradimi?
— Xudoga shukr, salomatman. To‘g‘ri, oyoqda, belda, bo‘yinda biroz og‘riqlar bor. Lekin bular sahnaga chiqqanimdan keyin o‘tib ketadi. Lekin 12 metrdan sakramayman, Mo‘minsiz qolasiz. Texnik, xavfsizlik tomonlama barchasi o‘ylangan, xavotirga o‘rin yo‘q, hammasi zo‘r. Konsertning ilk kunida birinchi marta sakradim, rosti. Bir oy mobaynida shunday qilaman, deb o‘ylab kelayotgandim. Kecha esa tavakkal chiqib sakradim. Ana o‘sha repetitsiya bo‘ldi. Bunday g‘oyalarni birov aytmaydi, mening o‘zimdan chiqadi.
Konsert 2,5-3 soat davom etsa, shuning ikki soatida mening chiqishlarim bor. Rollarim muxlislarimga ma’qul bo‘lyapti, o‘zim xohlagan olqishni ulardan ololyapman. O‘ylaymanki, ular ham mendan kutgan narsasini olyapti, deydi ekstremal harakatlarni sevuvchi Mo‘min Ibrohimov.
“Million” oilasining 15 yillik do‘sti, xonanda Munisa Rizayeva Argentinadan qaytganiga ko‘p o‘tmagan bo‘lsa-da, jamoani qo‘llab-quvvatlash uchun “Xalqlar do‘stligi” saroyida muxlislar qatoridan o‘rin oldi.
— “Million” jiddiy mavzularni qog‘ozga o‘rab, kulgi orqali olib chiqadi. Men bunga doim to‘g‘ri qarayman va buning tarafdoriman, qo‘llab-quvvatlayman. Yoshlar uchun ko‘proq mavzular bo‘lsa yaxshi. Radar, gaz, “svet” — shu kabi muhokama qilinishi kerak bo‘lgan haqiqiy dolzarb muammolarni olib chiqishayotgani uchun ularga rahmat aytaman.
O‘zimning muxlislarim uchun ajoyib yangilik bor — oktyabr oyida “Humo arena”da bir kunlik yakkaxon konsertimni taqdim etaman. Bu 9 yil kutilgan konsert, chiptalar “issiq somsalar kabi” guvullab sotilib ketishini xohlayman. Sold out bo‘lishiga ham ishonaman, deydi Munisa Rizayeva.
Guruh sardori Davron Kabulov o‘tgan yili kuz faslida o‘tgan konsert u qadar ko‘ngildagidek o‘tmaganini aytib, bu safargisi uning o‘rnini ortig‘i bilan qoplayotgani va muxlislarning negativ izohlari haqida gapirdi.
— Avvalgi konsertlarni odamlar 20-30 marotaba ko‘rgan bo‘ladi va hazillar yod bo‘lib ketadi. Shu sababli har gal yangisi chiqqanda bunisi o‘xshamabdi, deyishadi. Uni ham 5-10 marta ko‘rgandan so‘ng kosa tagidagi nimkosalarni tushunishni boshlashadi. Ammo izohlar birinchi ko‘rishdan keyin yoziladi. Shu joyida ozroq ehtiyot bo‘lish kerak, deb o‘ylayman. Shaxsan o‘zim amalda izoh yozmayman, ammo xulosani 3-4 marta ko‘rgandan keyin chiqarishga odatlanganman.
Muxlis tomonidan chiptalar narxi biroz emas, anchayin qimmatligi aytildi. Odatda, chet ellik xonandalar Toshkentda konsert qo‘ysa, ularning chipta narxi shunday summaga baholanardi. O‘zbek qo‘shiqchilari orasida esa so‘nggi bor “Setora” guruhi konsertining chiptalari narxi ham anchayin qimmatga sotildi. Aktyorlar gonorari, dekoratsiyalarning ijara puli bor. Ammo yana qaysi omillar asoslanib bu yilgi narx belgilanganligi haqida jamoa lideri quyidagicha izoh berdi:
— Oddiy misol aytaman, Mo‘minning 15 soniya davom etadigan tepadan pastga qulab tushishi sahnasiga uchta sirk mutaxassislari ovora bo‘ladi. Ular kelib, aktyorning zararsiz yiqilishini ta’minlaydi. Undan tashqari, sport matlari joylashtiriladi. Parda ortidagi 110 kishiga haq to‘lanadi. Yoki bo‘lmasa, men Sevara Nazarxonning o‘rniga yangi chiqqan qandaydir konkursda ishtirok etayotgan xonandani “Million”ning muxlislariga tiqishtirayotganim yo‘q. Eng yaxshilarini, iqtisodiy tomonlama ham eng qimmatini ravo ko‘ryapman. Bunday narsalar arzon bo‘lmaydi, odatda.
“Balkon”ning chiptalarini yetti yildan buyon bitta ko‘rsatkichda ushlab turibman — 40 ming so‘mdan boshlanadi. 3700 ta chipta mengacha kelsa, shuning 1100 tasi “balkon” joylari. Uning hamma chiptasini sotgan taqdirimda “Xalqlar do‘stligi”ning ijara pulini ham qoplay olmayman.
Yaxshi mahsulotni arzonga sotib olib bo‘lmaydi, buni to‘g‘ri tushunish kerak. Shuncha sa’y-harakat qilingandan keyin xarajat ham shunga yarasha bo‘ladi, deydi Davron Kabulov.
Konsertdan to‘liq reportajni Daryo Lifestyle YouTube kanalida tomosha qilishingiz mumkin.
Izoh (0)