Yurakka yaqin nolalari, o‘ziga xos ovozi va yo‘nalishiga ega bo‘lgan xonanda Sardor Mamadaliyev 1—5-noyabr kunlari “Xalqlar do‘stligi” san’at saroyida “Sardori menman” nomli besh kunlik konsert dasturi bo‘lib o‘tmoqda. “Ko‘nglimda bir yor”, “Yig‘latma”, “Ajralishdik” kabi qo‘shiqlari hit darajasiga chiqqan xonandaning konsert dasturini “Daryo”da tomosha qiling.
Konsertda qiziqchi Elmurod Haqnazarov boshlovchilik qilib, hazillari bilan muxlislar kayfiyatini ko‘tarib turdi. Uch blokdan iborat bo‘lgan kechada 21 ta qo‘shiq kuylandi. Konsertning birinchi qismida xonanda otasi haqida gapirib, shu kunga yetishiga padarining duolari sababligini aytdi. Vafot etgan onasi haqida kuylaganda san’atkorning o‘zi ham yig‘ladi, zaldagilarni ham yig‘latdi.
— “Birinchi marta to‘liq jonli ijroda konsert berishim, lekin qiyinchilik sezmadim”, deydi Sardor Mamadaliyev. “Avvalgi konsertlarimda 40-50 foiz jonli aytardim-u, to‘liq emas. 100 foiz jonli ijroning o‘ziga yarasha zavqi bo‘larkan, muxlislardan energiya olasiz va ularga yanada ko‘prog‘ini bera olasiz. Kecha sahnada turganimda bir xayol keldi — bugun 11-konsertim bo‘lsa, nega shu kungacha jonli kuylamaganman, dedim o‘zimga. Bundan keyin fonogramma orqali konsert qo‘ymoqchi emasman!”
“Bu yilgi konsertda duet bo‘lmaydi, sababi ko‘nglimdagidek duet yaratolmadik. Shogirdim Doston Ergashev bilan duet kuylagandim, Sevinch Mo‘minova bilan ham qo‘shiq aytdim, lekin qachon men o‘ylagan darajadagi duet chiqsagina konsertda ijro etamiz. Doston faqat jonli kuylaydi, Sevinchda ham jonli ijroda muammo yo‘q. Ularning ham har kuni xizmati bor, ikkisi ham xaridori ko‘p san’atkor, shuning uchun besh kun davomida konsertda ushlab turolmaymiz”.
Xonandaning san’atga qiziqishi bo‘lgan sakkiz yoshli o‘g‘li Temurbek “Qoshi qarolar” qo‘shig‘idan parchani jonli kuylab berdi.
— “Konsertda 6-7 ta qo‘shiq premyerasi bo‘ladi, qolgani odamlarning qulog‘iga tanish o‘sha barcha bilgan qo‘shiqlar — “Yig‘latma”, “Ko‘nglimda bir yor”, “Ajralishdik”, “Yor kerak menga”, “Qoshi qarolar”. Bu qo‘shiqlarni butun zaldagilar menga jo‘r bo‘lib kuyladi. Muxlislar maza qilishi uchun ko‘proq hamma bilgan qo‘shiqlarni tanlashga qaror qildik”.
“O‘n yil tanaffussiz konsert qo‘ydim, buyog‘iga har ikki yilda bir qo‘ymoqchiman. Sababi yoshga ham bog‘liq, yoshlikda odam charchamaydi, konsertga yaxshigina kuch sarflanadi”, deydi xonanda.
Sardor Mamadaliyev el ardog‘ida bo‘lgan bir qator marhum ustoz san’atkorlar va xalq hurmat qilgan insonlar — Hojiboy Tojiboyev, Ruslan Sharipov, Abduraim Abduvahobov, Murod Rajabov, Fathulla Mas’udov, shoirlar Abdulla Oripov, Muhammad Yusuf, sportchi Murod Xonto‘rayev hamda Farhod Mannopovlarning surati aks etgan videoni katta ekranda ko‘rsatib, “Unutmoq osonmas sizlarni” qo‘shig‘ini kuyladi.
Repertuaringizda sho‘x, raqsbop qo‘shiqlarga qaraganda, dardli kuylar nisbatan ko‘proq. Buning o‘ziga xos sababi bormi yoki xarakteringizga bog‘liqmi, degan savolga xonanda quyidagicha javob berdi:
— “Men hech qachon to‘y uchun yoki boshqa biror maqsadni ko‘zlab qo‘shiq yozmaganman. Qo‘shiqlarimni o‘zim bastalayman, yuragim nimani buyursa shuni kuylayman. Bizda ko‘pchilik to‘y uchun ijod qiladi-ku, men unday emasman. San’atga biznesga qaragandek qaramayman — ilhom kelmasa 2-3 yillab ham ashula chiqarmayman”.
Kun kelib hozir ommalashgan retro uslubida ham qo‘shiq kuylashingiz mumkinmi degan savolga esa shunday deya javob berdi:
— “Bo‘lishi mumkin, yurak nima desa shuni qiladigan san’atkorman. Menga qolsa rok qo‘shiqlar aytgim keladi. Avvalgi konsertning bir blokini rokka bag‘ishladim, lekin hech kim tushunmadi. Tomirimizda Sharq qoni oqayotgani uchun ham ko‘proq sharqona qo‘shiqlarga e’tiborimni qaratganman. Qo‘shiqlarimning 99 foizini o‘zim bastalayman”.
“Konsertdan keyin butun respublika bo‘ylab gastrol safarlariga ham chiqish rejamizda bor. Viloyatdagi muxlislarimizni ham shu programma bilan ko‘nglini olamiz”, deydi xonanda.
Reportajni to‘liq holda Daryo Lifestyle kanalida tomosha qiling.
Izoh (0)