O‘zbekiston xalq artisti, xonanda Mahmud Namozov “Daryo” uchun maxsus intervyu berdi. Intervyu davomida u yosh va professional xonandalarning xatosi, internetda urush qilayotgan san’atkorlar, yeyotgan ovqatini deb negativ eshitgani hamda prezident bayramlarda san’atkorlarning shaxsan o‘ziga nimalar deyishi haqida gapirdi.
“Yoshlarning xatosi kechirimli, katta san’atkorlarniki emas”
— Men demokrat odamman, yosh qo‘shiqchilarga imkon berish kerak, deb hisoblayman. Katta-katta san’atkorlar, professional qo‘shiqchilar folklor janrini buzib aytsa, xafa bo‘lish mumkin, ammo yoshlarniki kechirimli. Ular hozir yurtimizda kuylab, keyin chet davlatlarga chiqqanda, xatosi nimada bo‘layotganini anglaydi va darrov tuzatadi.
Oddiy misol, Sevara Nazarxon butun dunyo bo‘ylab yuribdi. Sevara Nazarxon estrada xonandasimi? “Namanganning olmasi, anori bordurey” deya folklordan shunday chiroyli foydalanib, dunyoni lol qoldirib yuribdi. Shunday san’at, shunday ohang dunyoga kerakligini u bilyapti. Chetdagilar esa bu qanday qo‘shiq ekan, Nazarxonning ijodimikan deb o‘ylaydi. Millatning qo‘shig‘i bu! Sevara Nazarxon bundan chiroyli foydalanib yurgani o‘zining ham, millatning ham yutug‘i, deydi xonanda.
“Yegan ovqatimni internetga joylaganim uchun negativga duch kelganman”
— Bir kuni Abdurashid Yo‘ldoshev va boshqa san’atkorlar bilan Jizzaxga konsert berish uchun bordik. Bizni kutib olgan insonlar avval tamaddi qilib olinglar, deya yaxshi joyga olib bordi. Xursand bo‘lib, yelib-yugurib xizmat qilishdi, turli noz-ne’matlardan oldimizga qo‘yishdi. Shuni Instagram’ga joylagandim. Men Instagram’da post joylasam, Facebook’da ham avtomatik tarzda chiqadi.
Esimdan ham chiqib ketgandi, bir yigit xalq artistlari, san’atkorlargayam besh ketmayman, yegan dasturxoni-yu ovqatini ommaga maqtanadi, shuyam ishmi, odam ozroq uyalishi kerak, deya rosa yozibdi. Nima qilishni bilmay asta shaxsiy sahifasiga o‘tdim-da, salomlashib yozdim. Keyin “Bilasizmi, o‘sha ovqatlarni maqtab yedig-u, aslida yaxshi emas ekan. Jon kuydirib xizmat qilgani uchun zo‘r deb qo‘ygandik-da” desam haligi odam “E, aka, bizga ham javob yozarkansiz-ku. Doim maqtab izoh qoldirsam, hech javob qaytarmaysiz, negativ yozganimda darhol javob yozyapsiz. Siz bilan suhbatlashishga ham erishdim” deya xursand bo‘lgandi. U javob qaytaramanmi, yo‘qmi, shuni sinab ko‘rmoqchi bo‘lgan ekan.
San’atkor faqat sahnada qo‘shiq aytadi degani emas, biz ham insonmiz, bir piyola choy ichamiz, kim bilandir tanishamiz — shularni e’tirof qilgimiz keladi-da. Qo‘shiq aytishimizdan ko‘ra shunday samimiy suhbatlar ba’zilarga ko‘proq yoqadi, deya kulib eslaydi Mahmud Namozov.
“Antireklama ham reklama deydigan san’atkorlar bor”
— Hozir ba’zi san’atkorlar uchun antireklama ham reklama bo‘lib qolgan. Urush-janjalli munosabatini internetga olib chiqadi, men bunday narsaga mutlaq qarshiman. Nafaqat san’atkorlar, balki boshqalarga ham tegishli bu. Agar o‘zimning kimdadir gapim bo‘lsa, shu odamni topib, shaxsan gaplashaman.
Ijtimoiy tarmoq juda katta maydon — uni butun dunyo ko‘radi. Bizda nima bo‘layotganini Amerikadagilar, Yevropadagilar juda yaxshi biladi. Qayerda benzin yo‘qligini, qayerda avtohalokat bo‘lganini, “svet” o‘chib qolganini, deydi xalq artisti.
Davlat tadbirlarida prezident ba’zi san’atkorlarning yonida uzoqroq suhbatlashib qoladi, shunday paytda yurtboshi ijodkorlarga nima deydi?
— Davlat rahbarlari ham inson, ularning ham hissiyoti bor. Davlat tadbirlarida yurtboshimiz bilan ko‘rishib qolganimizda samimiy salom-alik bo‘lgan. Yaxshimisan, ishlaring yaxshimi, sog‘lig‘ing yaxshimi, degan gaplar bo‘ladi. Prezident san’atga nisbatan, bizga nisbatan samimiy — ko‘rishib qolsak motivatsiya beradilar. Kuzatib boraman, yaxshi ishlashing kerak, deydilar.
To‘liq suhbatni Daryo Lifestyle YouTube kanalida tomosha qilishingiz mumkin.
Izoh (0)