TikTok кутилмаган янгиликни жорий қилди: эндиликда вояга етмаган фойдаланувчилар учун кечки соат 22:00 дан кейин автоматик тарзда нафас олиш бўйича медитация машқлари ишга тушади. Тинчлантирувчи мусиқа остида экранда тўғри дам олиш бўйича фойдали маслаҳатлар пайдо бўлади.
Компаниянинг таъкидлашича, бу функция фойдаланувчиларнинг уйқу сифатини яхшилаш ва тунда TikTok’да ўтказиладиган вақтни қисқартиришга хизмат қилади. Функция барча фойдаланувчилар учун мавжуд бўлиб, вояга етмаганлар иловасида автоматик тарзда ишга тушади.
Катта ёшдаги фойдаланувчилар эса ушбу функцияни илова созламаларидаги “Экран вақти” бўлимига кириб, “Уйқу соати” режими орқали мустақил тарзда ёқишлари мумкин. Шунингдек, улар эслатмалар учун исталган вақтни авалдан белгилаш имконига эга бўлади.
Мазкур янгилик TikTok фойдаланувчиларнинг руҳий саломатлигини қўллаб-қувватлашга қаратилган кенг миқёсдаги ташаббусининг бир қисмидир. Дастур доирасида компания 2,3 миллион доллар маблағ ажратган. Ушбу сармоя таълимий-тарбиявий ва фойдали контент яратиш ҳамда руҳий саломатликнинг аҳамияти ҳақида хабардорликни оширишга йўналтирилади.
Изоҳ (0)