Afsonaviy “Setora” guruhi uzoq yillik tanaffusdan so‘ng sahnaga qaytyapti. Guruh so‘nggi bor 2004-yilda konsert dasturini muxlislar e’tiboriga taqdim etgandi. Oradan roppa-rosa 20 yil o‘tib, 1—3-dekabr kunlari “Xalqlar do‘stligi” san’at saroyida afsonaning qaytishiga guvoh bo‘lishingiz mumkin. “Setora” guruhi konsertdan avval OAV vakillari bilan matbuot anjumani o‘tkazdi.
Boshlovchi Davron Kabulov “Setora” guruhining tashkiliy ishlar bo‘yicha prodyuseri sifatida guruh a’zolari bilan birga matbuot anjumanida qatnashdi. “Setora” qizlari — Laylo, Feruza hamda Komila bundan yigirma yillar avval noyabr oyida so‘nggi konsertini bergani va yana noyabrning oxiri, dekabrning ilk kunlarida ularga “Xalqlar do‘stligi”ning eshiklari ochilayotganini o‘ziga xos belgi deb bildi. Jurnalistlarning uzoq kutilgan konsertda qanday yangiliklar bo‘ladi, degan savoliga Komila Xo‘jayeva shunday javob berdi:
— Bizni uzoq yillar kutgan, sog‘ingan muxlislarimiz bor, ular uchun eng hit darajasiga chiqqan, shlyager qo‘shiqlarimizni ijro etamiz. Bu biz uchun qaysidir ma’noda ortga qaytish hissini tuyishimizga yordam beradi. Aynan 20 yil avval, 1-dekabrda “Tarona rekords”da bizning birinchi noxush suhbatimiz bo‘lib o‘tgandi va “Setora” katta tanlov qarshisida qolgandi. Yillab tanaffusdan so‘ng bizga chinakamiga ishonib qo‘llab-quvvatlagan inson Davron Kabulovdan chinakamiga minnatdormiz. Bizning konsert berishimiz fikri Davrondan chiqdi va bu fikr unga bir necha yillar avval kelgan ekan.
“Setora”ning konsertini kutayotgan muxlislarni suvga tashna bo‘lib turgan insonga o‘xshatsa bo‘ladi. E’tiborni tortish uchun bu guruh o‘zgacha yo‘nalish, sahna dekoratsiyalari yoki qandaydir piarga muhtoj emas, deb o‘ylayman. “Setora”ning shunchaki o‘zini sevadigan muxlislari bor. Qo‘shiqlar masalasiga kelsak, yangilik yo‘q emas, bor, albatta. Guruhning hech bir qo‘shig‘i konsertda eski talqinda bo‘lmaydi. Barchasi yangi talqinda, hozirgi ovozda kuylanadi. Agar birorta taronani eski talqinda eshitsangiz, bemalol mening ustimdan yozib berishingiz mumkin (kulib). Bu ishga harakatni shu yilning boshida boshlaganmiz. Konsertda fonogrammadan foydalanilayotgani tashkiliy ishlar bilan bog‘liq. Menimcha, konsertda fonogramma yoki jonli ijroda kuylashning ahamiyati u qadar katta emas. Eng muhimi, tomoshabin zavqqa to‘lsa, bas.
2019-yilda “Million” jamoasining konsertida “Setora”ni mehmon san’atkorlar sifatida sahnaga olib chiqishga birinchi qadamni qo‘ygandim. Ularni san’at saroyining sahnasiga olib chiqquncha juda ko‘p to‘siqlarga duch kelganman, ammo buni o‘z jamoamga ham, guruh qizlariga ham aytmaganman. O‘sha vaqtda guruhning yakkaxon konserti haqida biroz gaplashganmiz-u, lekin bu faqat orzu bo‘lgan. Oradan besh yil o‘tib, o‘sha orzuning ro‘yobini ko‘rib turibmiz, deydi Davron Kabulov.
“Daryo” muxbirining “Konsertdan keyin guruh to‘liq tarkibda ijodni O‘zbekistonda davom ettiradimi?” degan savoliga Feruza Latipova javob berdi:
— Albatta, ijodni davom ettiramiz, lekin shoshib, pala-partishlik bilan emas. Yangi ijod namunalarini sekin-sekin berib boramiz, yana konsert berish niyatimiz bor. Ammo, bilasiz, men Amerikada yashayman, shunday bo‘lsa-da, bundan buyog‘iga O‘zbekistonga tez-tez kelib turaman, dedi u.
Guruh a’zosi Feruza Latipova uzoq yillardan beri AQSHda yashab, o‘sha yerda ijodini davom ettiryapti. U Amerikadagi o‘zbeklarning to‘ylariga, kelin salom marosimlariga borib, xizmatda bo‘ladi, o‘zbeklar bilan hamnafas yashaydi.
“Setora” guruhi a’zolarining imiji o‘sha davrlarda o‘zbek qizlari orasida juda ommalashgandi. Konsertda o‘sha davr muhitini qaytarishga guruh qizlari va’da berdi.
Konsertda “Xayr maktabim” taronasidagi duetdosh Ravshan Sobirov sahnaga chiqadimi, umuman olganda, duet taronalar bo‘ladimi, degan savolga guruh a’zolari “Bu sir, konsertga kelgan muxlislar bilib oladi” deya barcha tafsilotlarni bo‘lishishni istamadi.
Shuncha yillik tanaffusdan so‘ng konsert nega atigi uch kun davom etayotganiga Davron Kabulov shunday izoh berdi:
“Xalqlar do‘stligi” saroyida hozir qizg‘in davr. “Setora” u yoqda tursin, yana boshqa yirik san’atkorlar bo‘lsa ham, konsertiga bo‘sh kun topolmasdi. Shu sababli uch kunlik dastur ichida beshta seans bo‘lyapti. Bu, albatta, “Setora”ni sog‘ingan muxlislari uchun!
Videoni to‘liq holda “Daryo”ning Lifestyle YouTube kanalida tomosha qiling.
Komila Qalandarova tayyorladi.
Izoh (0)