Kuni kecha muhtasham “Xalqlar do‘stligi” san’at saroyida “O‘zbekkonsert” tomonidan ilk marotaba o‘tkazilgan “O‘zbegim — 2024” milliy taqdimotining tantanali taqdirlash marosimi bo‘lib o‘tdi.
“O‘zbegim — 2024” taqdirlash marosimi yosh va iqtidorli ijrochilarni, estrada xonandalarini qo‘llab-quvvatlash, qo‘shiqlarning badiiy saviyasini ham oshirishga qaratilgan qadam bo‘ldi. Yil davomida o‘z ijodi bilan xalq qalbidan joy olgan bir qator ijodkorlar 11 ta nominatsiya bo‘yicha taqdirlandi. Bundan tashqari maxsus rag‘batlantiruvchi nominatsiyalar bo‘yicha ham mukofotlar topshirildi.
-iI0h3UCd.jpg)
Yorqin lahzalarga boy o‘tgan tadbirda Jamshid Umrzoqov va Laziza Nozimxonova boshlovchilik qildi.
Yilning “eng yaxshi”lari muxlislar yo‘llagan bevosita ovozlar orqali ma’lum bo‘lgan.
“Yilning eng faol ijodkori”
Nomzodlikka uch san’atkor qo‘yilgan — Ulug‘bek Rahmatullayev, Hamdam Sobirov, Muhammadziyo. Taqdirlash marosimida muxlislarining bergan ovozi orqali “Yilning eng faol ijodkori” nominatsiyasi Muhammadziyoga nasib qildi.
“Yilning eng yaxshi ayol xonandasi”
Nomzodi qo‘yilgan uchala xonanda ham mukofotga loyiq, albatta, — Rayhon, Ozoda Nursaidova hamda Munisa Rizayeva. Muxlislarning e’tirofi bilan mazkur nominatsiyani Ozoda Nursaidova qo‘lga kiritdi. Shubhasiz, bu yil xonanda uchun sermahsul va omadli yil bo‘lib, qator taronalari xit darajasiga yetdi.
“Yilning eng yaxshi erkak xonandasi”
Nomzodlar ro‘yxatida ijodda bir-biridan o‘tuvchi xonandalar joy olgan — Botir Qodirov, Shohruhxon va Hamdam Sobirov. Mukofot qo‘shiqlari xalq qalbidan joy olib kelayotgan, estradada retro uslubida ijod qilishni boshlab bergan Hamdam Sobirovga nasib etdi.
“Yilning eng yaxshi so‘z ustasi”
Taqdirlash marosimlarida ilk bora so‘z ustalari uchun ham nominatsiya tashkil etilgani alohida e’tirofga loyiq, albatta. Mazkur nominatsiyadagi so‘z ustalari va qiziqchilarni siz yaxshi taniysiz — Jamshid Normatov, Avaz Oxun va Elmurod Haqnazarov. Muxlislarning e’tirofi bilan bu mukofotga ijodiga 11 yil to‘lgan so‘z ustasi Avaz Oxun loyiq deb topildi.
“Yilning eng yaxshi shou-konserti”
Xonandalar orasida shou-konsert berish anchayin ommalashgan. Yil boshida Rayhon va Shohruhxon shou-konsertini muxlislar e’tiboriga taqdim etgan bo‘lsa, kuz oylarida 6 yillik ijodiy tanaffusdan so‘ng Lola “bomba” atmosferada o‘z konsertini o‘tkazdi. Mukofot ham eng yaxshi shou uchun Lolaga nasib etdi. Xonandaga mukofotni ustoz san’atkor Yodgor Sa’diyev topshirdi.
“Yil qo‘shig‘i”
2024-yil o‘zbek estradasida anchayin sermahsul yil bo‘ldi desak, adashmagan bo‘lamiz. O‘zbekcha kuy-qo‘shiqlar jahon arenalarida ham yangradi, YouTubeda eng ko‘p ko‘rishlar soniga ham ega bo‘ldi — bir so‘z bilan aytganda “trend” qo‘shiqlarning keti uzilmadi. “Yil qo‘shig‘i” nominatsiyasiga Botir Qodirovning “Sevgisi yolg‘onim” taronasi, Ozoda Nursaidovaning “Javohir”i hamda Otabek Muhammadzohidning “Sendaqasi yo‘q” qo‘shig‘i qo‘yildi. Yig‘ilgan ovozlar natijasiga ko‘ra “Javohir” qo‘shig‘i mukofotga loyiq deb topildi.
“Yilning eng yaxshi estrada guruhi”
O‘zbek estrada guruhlaridan kimlar e’tirofga loyiq deb hisoblaysiz? “Setora”, “Benom” hamda “Bojalar” — har birining o‘z tinglovchisi va muxlislari yetarlicha. 2024-yilda haqiqatdan ham tinmay ijod qilgan, jonli ijroda ikki marotaba konsert bergan “Benom” guruhi tomoshabinlar bergan ovozi orqali ushbu nominatsiya g‘olibi deya topildi.
“Estradamiz nostalgiyasi”
Bu noodatiy nominatsiyaga uch erkak san’atkor — Anvar Sanayev, “Sahar” guruhi solisti Anvar Jo‘rayev hamda Dj Piligrim taxallusi bilan ijod qiluvchi Ilhom Yo‘lchiyev nomzodi qo‘yildi. O‘zbek estradasi nostalgiyasi ruhini beruvchi san’atkor sifatida tinglovchilar ovozi orqali Dj Piligrim “Estradamiz nostalgiyasi” mukofotini qo‘lga kiritdi!
“Yil yangi ovozi”
Yosh va iste’dodli qo‘shiqchilarni qo‘llab-quvvatlash uchun “Yil yangi ovozi” nominatsiyasi ta’sis etildi. Nomzodlikka qo‘yilgan Shahzod Ergashev, Ruxsora Otajonova va Akmalxo‘ja Xolxo‘jayev orasidan Shahzod Ergashev mukofotga loyiq deb topildi.
“Vatanparvarlik tarannumi uchun”
Ushbu nominatsiyaga uch nafar eng yaxshi xonandaning qo‘shiqlari bilan nomzodi qo‘yildi. G‘ulomjon Yoqubov, Sevara Nazarxon va Milena Madmusayeva vatan haqidagi eng yaxshi qo‘shig‘i uchun “bellashdi”. Mukofot noodatiy ijodiy yo‘li bilan ko‘plarning qalbidan joy olgan Sevara Nazarxonga nasib etdi.
Shu jumladan, “O‘zbekkonsert” e’tirofi” bo‘yicha xonanda Imron, “Madaniy tadbirlardagi faolligi uchun” Jahongir Poziljonov, “O‘zbek estrada san’ati rivojiga qo‘shgan hissasi uchun” Rayhon G‘aniyeva, “Millat kuychisi” e’tirofiga Farrux Zokirov va G‘ulomjon Yoqubov munosib deb ko‘rildi.
Tadbirga ishtirokchi va mehmon sifatida tashrif buyurgan har bir xonanda o‘z repertuaridagi eng sara qo‘shiqlari bilan yorqin chiqishlar qildi. Taqdirlash marosimi yuqori kayfiyat va bayramona ruhda o‘tdi.
Taqdirlash marosimi to‘liq holda Daryo Lifestyle YouTube kanalida tomosha qilib, yilning eng yaxshilarini bilib olishingiz mumkin.
Izoh (0)